ဆရာရှင့် အခုတလော အသား ငါးနှင့်ပဲသွေးများမှာ ဖော်မလင်သုံးကြောင်း facebook မှာတွေ့ရပါတယ်။ ကြက်သား မစားရင် အသားဓာတ်ရအောင် ဘယ်အသီးအရွက်ကို စားသင့်ပါသလဲသိပါရစေရှင့်။
ဖေ့စ်ဘွတ်မှာရေးကြတဲ့ တခြားအကြောင်းအရာတွေကိုတော့ သိပ်မသိပါ။ ကျန်းမာရေးနဲ့ ဆေးဝါးတွေကိုတော့ ကောင်းကောင်းသိပါတယ်။ ကြော်ငြာဆေးတွေလည်း အကုန်သိတယ်။ အမှားတွေ များတယ်။ အလွဲတွေ များတယ်။ ခြိမ်းခြောက်တာတွေ များတယ်။ ဆွဲဆောင်တာတွေ များတယ်။ ဖြဲခြောက်တာတွေ များတယ်။ ပိုက်ဆံလိုချင်လို့ ကောင်းပါတယ်ပြောတာ များတယ်။
ပရိုတင်းကို အရင်က အသားဓါတ်လို့ခေါ်တယ်။ သိပ်မမှန်လို့ ခေါ်တော့ပါ။ ပရိုတင်းဆိုတာ ကိုယ်ခန္ဓာအတွက် မရှိမဖြစ်တဲ့ အမိုင်နိုအက်စစ်တွေ ပါဝင်တယ်။ ပျက်စီးသွားတဲ့ တစ်ရှူးတွေ၊ ဆဲလ်တွေ အစားထိုးဘို့နဲ့ အဲတာတွေ အသစ်ပြန်လုပ်ဘို့ အသုံးကျတယ်။
ပရိုတင်းကို အသားအမျိုးမျိုး၊ ပင်လယ်စာတွေ၊ ပဲပုပ်အပါအဝင် ပဲအမျိုးမျိုး၊ ငါးအမျိုးမျိုး၊ ဥအမျိုးမျိုး၊ အစေ့အဆံ၊ နို့နဲ့ နို့ထွက်ပစ္စည်းတွေကရရှိတယ်။ ကိုယ်အလေးချိန် ၇ဝ ကီလို ရှိသူအတွက် တနေ့ ပရိုတင်း ၇ဝ ဂရမ်လိုအပ်တယ်။ ဖိုင်ဗာ ဆိုတာ အသီးအနှံတွေမှာပါတယ်။
မက်မွန်သီး၊ စွန်ပုလွန်သီး၊ ထောပတ်သီး၊ စတဲ့အသီးတွေမှာလည်း ပရိုတင်းပါတယ်။ ဟင်းနုနွယ်ရွက်၊ ကာလီရွက်၊ မုန်လာပွင့်၊ ဘရိုကိုလီ၊ ပဲပင်ပေါက်အမျိုးမျိုး၊ မှိုတွေမှာလည်း ပရိုတင်းပါတယ်။
အသားနဲ့အတူပါနေတဲ့ အဆီဓါတ်ကိုသတိထားရမယ်။ တချို့အဆီတွေက ကျန်းမာရေးအတွက်မကောင်းပါ။ မတည့်သူတွေ အလာဂျီရတတ်တယ်။ တချို့လူတွေအတွက် အမဲသား ဆိတ်သားဟာ ကြက်သားလောက် ကျန်းမာရေးအတွက် မကောင်းပါ။ ပရိုတင်းများတာက နှလုံးသွေးကြောရောဂါရှိသူတွေနဲ့ ဆီးချိုရှိသူတွေအတွက် မကောင်းပါ။ ငါးက ကောင်းတယ်။ ကင်ဆာအတွက်တော့ သုတေသန်လုပ်နေဆဲသာရှိတယ်။ များတာထက် ပရိုတင်းအမျိုးအစာကို ပိုသတိထားရမယ်။ ဥပမာ အူမကြီးကင်ဆာ။ ပရိုတင်းများတာ အရိုးအားနည်းစေနိုင်တယ်။ အဲဒီရောဂါကို သွေးဆုံးအမျိုးသမီးတွေသတိထားသင့်တယ်။
အသားတွေကနေရတဲ့ပရိုတင်းထဲမှာ အဆင်ရှယ်အမိုင်နိုအက်စစ်ဓါတ်အစုံပါတယ်။ သက်သတ်လွတ်စားရင် အစုံမရနိုင်ပါ။
ဒေါက်တာတင့်ဆွေ
https://www.facebook.com/drtintswe/
