အာဆင်နယ် အသင်းအနေဖြင့် မော်ရိုဖယ်လိုင်နီကို ခေါ်ယူရန် ကြိုးပမ်းမှုတွင် ကစားသမား၏ လုပ်ခလစာ တောင်းဆိုမှုကြောင့် အကျပ်တွေ့ဖွယ် ရှိနေကြောင်း သိရသည်။ အဲဗာတန် အသင်း၏ ကွင်းလယ် ကစားသမားသည် အကယ်၍ အာဆင်နယ်နှင့် စာချုပ်ဖြစ်ပါက အသင်း၏ လက်ရှိ လုပ်ခလစာ အမြင့်မားဆုံး ကစားသမားများဖြစ်သည့် လူးကက်စ် ပိုဒေါ့စကီး၊ သီအိုဝဲလ်ကော့တ်တို့နည်းတူ တစ်ပတ်လျှင် စတာလင်ပေါင် (၁၀၀၀၀၀)မျှ ရရှိရန် လိုလားနေကြောင်း သတင်းများက ဆိုသည်။ အာဆင်နယ်သည် ရီးယဲလ်မက်ဒရစ် တိုက်စစ်မှူး ဂွန်ဇာလို ဟီဂူရင်းကို ခေါ်ယူရန် ချိတ်ဆက်နေဆဲဖြစ်ပြီး အဆိုပါ ကစားသမားအတွက်လည်း ယင်းလုပ်ခ ပမာဏမျိုး ပေးချေရန် စီစဉ်ထားသည်။
အသက်(၂၅)နှစ်ရှိ ဘယ်လ်ဂျီယံ လက်ရွေးစင် ဖယ်လိုင်နီသည် လက်ရှိတွင် အဲဗာတန်၌ တစ်ပတ် ပေါင်စတာလင် (၇၅၀၀၀)မျှ ရရှိနေသူ ဖြစ်သည်။ အာဆင်နယ်သည် ဖယ်လိုင်နီကို ဝယ်ယူပါက ပြောင်းရွှေ့ကြေး စတာလင်ပေါင် (၂၂)သန်းမျှလည်း ကုန်ကျဖွယ် ရှိနေသည်။ အာဆင်နယ်တွင် လုပ်ခလစာ ကန့်သတ်မှု စည်းမျဉ်းများ သတ်မှတ်ထားရာ ဖယ်လိုင်နီ၏ လုပ်ခကိစ္စအတွက် ညှိနှိုင်းရန်မှာ ဘောင်ကျဉ်းလွန်းသည့် အခြေအနေ ဖြစ်နေသည်။ ဖယ်လိုင်နီကို ရုရှားကလပ် ဇင်းနစ် စိန့်ပီတာစဘာ့ဂ်ကလည်း စိတ်ဝင်စားနေကြောင်း သိရှိရသည်။
Source: DailyMail
Planet Myanmar Network
