ချယ်လ်ဆီး အသင်းသည် နာပိုလီ တိုက်စစ်မှူး အီဒင်ဆန် ကာဗာနီကို ခေါ်ယူရန်အတွက် ပြောင်းရွှေ့ကြေး သဘောတူညီချက် ရရှိခဲ့ပြီဟု သိရသည်။ ရီးယဲလ်မက်ဒရစ်နှင့် မန်ချက်စတာ စီးတီးတို့သည် ခေါ်ဈေး မြင့်မားလွန်းသော ကစားသမားအတွက် လက်လျှော့သွားပြီးနောက် မန်ချက်စတာ ယူနိုက်တက်က စိတ်ဝင်စားမှု ပြသခဲ့သော်လည်း ဇွဲကောင်းကောင်းနှင့် ဆက်လက် ဆွေးနွေးနေသည့် ချယ်လ်ဆီးက အသာစီး ရသွားခဲ့ကြောင်း သတင်းများက ဆိုသည်။ နာပိုလီ အသင်းနှင့် ဆက်နွယ်မှုရှိသော Radio Marteက အသံလွှင့် ကြေညာချက် တစ်ခုတွင် နာပိုလီအသင်းမှ ခိုင်မာသော သတင်းရင်းမြစ် တစ်ခုကို ကိုးကားပြီး ကာဗာနီကို ချယ်လ်ဆီးက ခေါ်ယူနိုင်ရန် သဘောတူညီချက် ရရှိသွားပြီဟု ဖော်ပြခဲ့သည်။
တိုက်စစ်မှူးသစ် တစ်ဦးကို ရှာဖွေနေသော ချယ်လ်ဆီးသည် အသက်(၂၆)နှစ်ရှိ ဥရုဂွေး လက်ရွေးစင်အတွက် ပေါင်စတာလင် (၄၉.၃)သန်းထိ ပေးချေရမည်ဟု သတင်းများက ဆိုသည်။ နာပိုလီသည် ၎င်းတို့၏ သတ်မှတ် ဈေးနှုန်းထက် အနည်းငယ် လျှော့ပေါ့ပေးရန် သဘောတူညီခဲ့သည်။ ကစားသမားသည် ပုံရိပ် အသုံးပြုခအပြင် တစ်နှစ်လုပ်ခ ယူရို (၈.၅)သန်းမျှ ခံစားခွင့် ရှိမည်ဟုလည်း သိရသည်။ ကာဗာနီသည် ပြီးခဲ့သည့် ရာသီက အီတလီ စီးရီးအေတွင် (၂၉)ဂိုး သွင်းယူကာ ပြိုင်ပွဲ၏ ဂိုးသွင်းဘုရင်အဖြစ် ရပ်တည်နိုင်ခဲ့သည်။
Source: DailyMail
Planet Myanmar Network
