ဆီးချိုအကြောင်း လူတိုင်းလိုလို ကြားဖူးကြသည့်တိုင် ဆီးချိုနှင့် ပတ်သက်ပြီး မှန်မှန်ကန်ကန် သိသူက ရှားသည်။ ဆီးချိုနှင့် ပတ်သက်ပြီး အယူအဆ လွဲနေသည့် အချက်အချို့ကို အောက်တွင် ဖော်ပြပါမည်။
အလွဲ ။ ။ ဆီးချိုဖြစ်ရင် သကြား လုံးဝမစားရ။
အမှန် ။ ။ ဆီးချိုရှိသူများလည်း သကြားစားလိုက စားနိုင်သည်။ အလွန်အကျွံ မဟုတ်၊ အနည်းငယ်ခန့် ထည့်စားလို့ရသည်။ သို့သော် စား သောက်မှုပုံစံကို ကျန်းမာအောင် ချိန်ညှိစားသုံးသူများသာ ထိုသို့ ထည့်သွင်း စားသုံးသင့်သည်။ ဆီးချိုနှင့် ကိုက်ညီအောင် အခြား အစားအစာများကိုပါ ချိန်ညှိ စားသုံးခြင်း မပြုပါက သကြားဓာတ်၏ အာနိသင်ကို ခန္ဓာကိုယ်က ချေဖျက်ဖို့ ခက်ခဲလိမ့်မည်။
အလွဲ ။ ။ ဆီးချိုလေး နည်းနည်း ဖြစ်တာပါ။
အမှန် ။ ။ ဆီးချိုလေး နည်းနည်း ဖြစ်တာပါဟု ဆိုခြင်းသည် ကိုယ်ဝန်လေး နည်းနည်း ရှိတာပါဟု ပြောခြင်းနှင့် အလားသဏ္ဍာန်တူသည်။ နည်းနည်း ရှိခြင်းသည် နောင်တွင် များများ ရှိလာမည့် လမ်းစသာ ဖြစ်သည်။ ကနဦး အဆင့်တွင် နိုင်နင်းစွာ ကုသနိုင်လိုက် သူအချို့ ဆီးချိုနောက်ကြောင်း ပြန်သွားတာမျိုး ရှိသော်လည်း အများစု အဖို့ကာ ဆီးချို ၀င်လာပြီဆိုလျှင် တစ်သက်တာ နပန်းလုံးရသော ကိစ္စမျိုးဖြစ်သည်။ ဆီးချို အများစုသည် အစားအသောက်၊ အနေအထိုင် မှန်အောင် ဂရုစိုက်သောနည်းဖြင့် ထိန်းထားလို့ ရသည်။
အလွဲ ။ ။ နေကောင်းနေတာပဲ၊ ဆီးချို ပူစရာ မရှိပါဘူး။
အမှန် ။ ။ သွေးတွင်း သကြားဓာတ် များပြားခြင်း၊ နည်းပါးခြင်းတို့ကြောင့် အခါခပ်သိမ်း သိသာသော လက္ခဏာများ ပြသလိမ့်မည် မဟုတ်။ လက္ခဏာ မပေါ်သည့်တိုင် ဆီးချို ပြဿနာက ရှိနေနိုင်သည်။ ဆီးချိုရှိသူ အနေဖြင့် နေကောင်း နေသည်ဆိုတိုင်း ပေါ့ပေါ့လျော့လျော့ နေလို့မရ။ အမြဲမပြတ် ဆီးချိုတိုင်းတာ စစ်ဆေးနေဖို့ လိုသည်။
အလွဲ။ ။ ကိုယ့်ဘာသာ ဆီးချိုစစ်လည်း ပြီးတာပဲ။ ဆေးခန်းသွားပြစရာ မလို။
အမှန် ။ ။ ဆေးပညာ နယ်ပယ်သည် ဆီးချိုနှင့် ပတ်သက်ပြီး အသစ် အသစ်တွေ အမြဲ တွေ့ရှိနေသည်။ ဆီးချိုကို အကောင်းဆုံး ရင်ဆိုင်နိုင်စေမည့် နည်းသစ်တွေလည်း မကြာမကြာ ထွက်ပေါ်နေသည်။ သို့ဖြစ်ရာ ဆေးခန်းသွားကာ ကျွမ်းကျင် ဆရာဝန်ထံ ပုံမှန်စစ်ဆေးမှု ခံယူခြင်းသည်လည်း ဆီးချိုဆိုင်ရာ မိမိမမြင်သာသော ပြဿနာများ တွေ့ရှိလာနိုင်သလို၊ ပိုကောင်းသော ကုသနည်း၊ နေထိုင်နည်းများကိုလည်း ဆရာဝန်ထံမှ အကြံဉာဏ် ရရှိနိုင်သည်။
အလွဲ ။ ။ အင်ဆူလင်တွေ၊ ဆေးတွေ သုံးရတဲ့ အဆင့် မရောက်သေးလို့ ငါ့ဆီးချို စိုးရိမ်စရာမရှိ။
အမှန် ။ ။ ဆီးချိုသည် အမြဲတစေ သတိထားရမည့် ရန်သူမျိုး ဖြစ်သည်။ ပေါ့ပေါ့တွက်လို့မရ။ ကျန်းမာအောင်စားခြင်း၊ လေ့ကျင့်ခန်းများ လုပ်ခြင်းကြောင့် သွေးတွင်း သကြားဓာတ်သည် လက်ခံနိုင်သော ကျန်းမာသည့် ဘောင်အတွင်းမှာ ရှိနေသည် မှန်သော်လည်း မိမိက စနစ်တကျ နေထိုင်ခြင်း မရှိသည်နှင့် သွေးတွင်း သကြားဓာတ်သည် ကျန်းမာရေး ဘောင်အတွင်းမှ ကျော်ထွက်သွားနိုင်သည်။
အကောင်းဆုံး ဘယ်လို နေထိုင်မလဲ၊
ဆီးချိုရှိလို့ စိတ်ဓာတ်ကျရန် မရှိ။ သွေးတွင်း သကြားဓာတ်ကို ပုံမှန် စောင့်ကြည့် စစ်ဆေးကာ လက်ခံနိုင်သော ဘောင်အတွင်း ရှိနေအောင် ထိန်းသိမ်းနေထိုင် စားသောက်ရန်သာ လိုသည်။
စမတ်ကျကျ စားသောက်တတ်ဖို့တော့လိုသည်။ ဆီးချိုရှိတယ် ဆိုတိုင်း မိမိကြိုက်သည့် အစားအစာတွေ အားလုံး စွန့်လွှတ်လိုက်ဖို့ မလို။ မိမိ ကြိုက်တာတွေကိုလည်း စားနိုင်သည်။ သို့သော် သွေးတွင်း သကြားဓာတ် လက်ခံနိုင်သော ဘောင်အတွင်း ရှိနေအောင် ထိန်းနိုင်မည့် သမမျှတသော စားသောက်မှု ပုံစံမျိုး ဖြစ်အောင် ဂရုစိုက်ဖို့လိုမည်။ မည်သည့် အစားအစာကိုမျှ အလွန်အကျွံမစားသင့်။ မည်သည့် အစာစားလျှင် မိမိသွေးတွင်း သကြားဓာတ် မည်မျှ အတက်အကျ ရှိသည်ကို မှတ်သားကာ အဆင်ပြေအောင် ထိန်းညှိ စားသုံးဖို့သာလိုသည်။ အစားတွေ အတင်းရှောင်နေရန် မလို။
လှုပ်လှုပ်ရှားရှား တက်တက်ကြွကြွနေပါ။ ဆီးချိုသမားအဖို့ အ၀မလွန်အောင် ထိန်းဖို့၊ သွေးတွင်း သကြားဓာတ်ပမာဏကို လက်ခံနိုင်သော ဘောင်အတွင်းမှာသာ ရှိနေစေဖို့ အရေးကြီးသလို၊ လှုပ်ရှားတက်ကြွစွာ နေဖြစ်ဖို့လည်း လိုသည်။ ခန္ဓာကိုယ် ကြွက်သားတွေ၊ နှလုံးတွေ၊ သွေးကြောတွေ အမြဲတက်ကြွ လန်းဆန်း နေအောင် အလုပ်ပေးထားပါ။ လမ်းလျှောက်ခြင်းသည် ဆီးချိုသမား အတွက် သင့်တော်သော လေ့ကျင့်ခန်း ဖြစ်သည်။
Myawady Health
https://www.facebook.com/pg/myawadyhealth
