Dr ဆောင်းပါးကို Blog မှာ ကလေးတစ်ယောက်ရဲ့စတင်ဖြစ်တည်ပုံကိုသိရှိခဲ့ရပါတယ် ။ ဒါကြောင့် စာရေးချင်နေတာ ကြာပါပြီ ။ သမီးအသက် ၃၇ ရှိပါပြီ ။ လမစေ့လို့ ကလေးတပတ်မပြည့်ခင်တစ်ယောက်၊ ၁ဝ ရက်ပြည့်တော့ တယောက် ဆုံးသွားပါတယ်ဆရာ။ OG ပြောတာက 33 ပတ်နဲ့ဖွားတော့ နလုံးအလုပ်ကောင်းကောင်း မလုပ်နိုင်သေးလို့ မရှင်တာပါတဲ့။ Ultrasound ၃ ကြိမ်ရိုက်ဖူးပါတယ်။ အားလုံးကောင်းပါတယ်။ ဖွားတော့ဆုံပိုင်းဖြစ်တဲ့အပြင် ကလေးနစ်ဦးက လည်တံချင်း လိမ်နေပါတယ်ဆရာ ။ သမီးကိုယ်ဝန် ၅ လအထိ ကျန်းမာရေးနည်းနည်းမကောင်းပါဘူး ။ နောက်ပိုင်းအရမ်းကောင်းပါတယ် ။ ဘာကြောင့်စောမွေးရတာပါလဲ။ ကိုယ်ဝန် ၄ လမှာ ဆီးလမ်းကြောင်းပိုးဝင် ကျောက်ကပ်မှာ sport တွေ့လို့ ၂ ပတ်ကျော်လောက် ဆေးကုသခဲ့ရပါတယ်။ သမီးက ဆရာမပါ ။ သင်တန်းတက်ရပါတယ် ။ တာဝန်ကျတာက ၄ နာရီခရီး စက်လှေစီးရပါတယ် ။ ကားတွေမရှိတော့လို့ ရန်ကုန်ပြန်ပြီးမှ သမီးတို့ဆီရောက်ဖို့ ၅ နာရီ ကားစီးရပါတယ်။ အများအပြောက ခရီးသွားတာများလို့ စောမွေးတာတဲ့။ မီးဖွားခွင့် သွားတင်ပါတယ်။ နေ့ချင်းပြန် သွားခဲ့ပါတယ်။ ဒါကြောင့်လို့ ပြောကြပါတယ် ။ အရပ်ထဲမှာပြောကြတာ ၇ လမွေး အသက်ရှင်တယ်တဲ့ ။ ဘာကြောင့် သမီးလေးတွေ မရှင်ရတာလဲ ။ ဒီတကြိမ် ကိုယ်ဝန် ပြန်ဆောင်ရင် စောမွေးမှာကြောက်ပါတယ် ။ ဒါကြောင့် ကိုယ်ဝန် ဘယ်နှစ်ပတ်မှာ ကိုယ်ဝန်စောမမွေးအောင် ဆေးထိုးရပါမလဲဆရာ ။
ကျွန်တော် OG မဟုတ်ပါ။ ကလေးစောမွေးတာကို Pre-term labor လို့လဲခေါ်တယ်။ ခန့်မှန်းခြေမွေးမဲ့ရက်ထက် ၃ ပါတ်စောရင်၊ ကိုယ်ဝန် ၃၇ ပါတ်ထက်စောမွေးရင် ခေါ်တယ် ။ စောမမွေးစေအောင် အိပ်ယာမှာ ဆေးရုံတက်သလို နားနေတာ ၊ အားဆေးသွင်းပေးတာ နဲ့ ဆေးပေးတာတွေနဲ့ အတော်များများကို ကာကွယ်နိုင်တယ် ။
တကမ္ဘာလုံးမှာ တနှစ်အောက်ကလေးသေဆုံးမှုထဲမှာ လမစေ့ဘဲမွေးတဲ့ကလေး ၁ဝ% ပါတယ် ။ အရေအတွက်ဆိုရင် တနှစ်မှာ အဲလိုကလေးပေါင်း ၅ သိန်းလောက်ရှိတယ် ။ ဘာလို့စောမွေးသလဲ တခါတလေ (၅ဝ%) အကြောင်းရှာမရဘူး ။ အာဟာရဓါတ်နည်းတာကို စဉ်းစားရတယ် ။ တခါအဲလိုမွေးဘူးသူတွေမှာ သူများထက် ၁၅-၅ဝ%) ပိုဖြစ်နိုင်တယ်။ ရာနှုန်းပြည့်မဟုတ်ပါ ။ ဖင်လန်မှာ ဆန်းစစ်မှုတခု လုပ်တော့ လက်ထပ်ပေါင်းသင်းခြင်းမရှိဘဲ ကလေးမွေးသူတွေမှာ ၂ဝ% ပိုများတာ တွေ့ရတယ် ။
အမွှာကိုယ်ဝန်မှာ ပိုဖြစ်တယ်။ ရောဂါပိုးဝင်တာကိုလဲ ထည့်တွက်ရတယ်။ ဥပမာ မွေးလမ်းကြောင်း ပိုးဝင်တာ ။ စမ်းသပ်ကြည့်ရင် မွေးလမ်း-သားအိမ်ဝအရည်ထဲမှာ Fetal fibronectin များနေရင် ဖြစ်တယ်။ Obstetric ultrasound အာလ်ထွာဆောင်းနဲ့လဲစစ်ရမယ်။ သားအိမ်ဝ (နှုတ်ခမ်း အလျား) တိုရင် မကောင်းပါ။ ကိုယ်ဝန် ၂၄ ပါတ်မှာ ၂၅ မီလီမီတာထက်ရှည်သင့်တယ်။ တချို့ ကိုယ်ဝန်ဆောင်မှာ အလုပ်လုပ်မျိုးတွေမှာ ဥပမာ မတ်တပ်အကြာကြီး ရပ်ရသူတွေမှာ အဖြစ်ပိုများတာ တွေ့ရတယ် ။ ဖေါလစ်အက်စစ်နည်းရင်လဲ မကောင်းပါ။ ဆီးစစ်လို့ ပိုးတွေ့ရင် ဆေးကုရမယ်။ Progesterone (ပရိုဂျက်တီရုန်း) ဟော်မုန်း ပေးသင့်ရင်ပေးရတယ်။ ၃၂ ပါတ်နောက်မှာပေးတယ်။
ကာကွယ်ဘို့ရာ Glucocorticosteroids စတီရွိုက်ဆေးပေးနည်းကို နေရာအတော်များများမှာသုံးတယ်။ တခြား စမ်းသပ်သုံးတဲ့ဆေးနည်းတွေလဲရှိပါတယ်။ NSAIDs, Magnesium sulfate, Calcium channel blockers, Beta mimetics, Atosiban တွေပါဝင်တယ်။ Tocolysis ဆေးလဲပါတယ်။ Calcium-channel blockers နဲ့ Oxytocin antagonist ဆေးတွေက ၄၈ နာရီနောက်ကျစေပေမဲ့ ဘေးထွက်-ဆိုးကျိုးတွေ လဲရတယ်။ Prophylactic antibiotic ကာကွယ်တဲ့သဘောနဲ့ ပိုးသေဆေးပေးနည်းကလဲ အကျိုးရှိတယ်။ Amoxicillin နဲ့ Erythromycin ဆေးတွေပေးတယ်။ ဒါပေမဲ့ Amoxicillin + Clavulanic acid ဆေးတွဲကို မသုံးသင့်ပါ။
Cervical cerclage သားအိမ်ဝမလုံသူတွေကို ကိုယ်ဝန်ဆောင်နေတုံးမှာ သားအိမ်ဝကို ချုပ်ပေးထား ရတယ်။ ကျွန်တော် ဒေလီ ဒုက္ခသည်တွေအတွက် ယမုန်နာဆေးခန်းလေးဖွင့်ခဲ့တုန်းက အဲလို ကိုယ်ဝန်ဆောင်တယောက်ကို သားအိမ်ဝ ချုပ်ပေးထားခဲ့တယ် ။ လမစေ့ခင် ဗိုက်နာလာတော့ ကျွန်တော်က အစည်းအဝေးတက်နေရတယ်။ ကံတရားလည်း အားကိုးရပါမယ်။
ဒေါက်တာတင့်ဆွေ
https://www.facebook.com/drtintswe
