ဆရာ လူတယောက်မှာ သွေး ၅ လီတာ မှ ၆ လီတာအထိရှိတယ်လို့ စာအုပ်ထဲမှာဖတ်ဖူးပါတယ်။ Blog စာမျက်နှာတခုမှာ ၇ လီတာလို့ ရေးထားတာတွေ့ရတယ်။ ဘယ်ဟာအမှန်လဲဆရာ။
ပုံမှန်လူတယောက်မှာ သွေး ၅ လီတာရှိပါတယ် ။ သွေးကို ခန္ဓာဗေဒမှာ ထူးခြားတဲ့ (ကွန်နက်တစ်-တစ်ရှူး) များထဲမှာ ထည့်ထားတယ်။ သွေးမှာ အခဲပိုင်းနဲ့ အရည်ပိုင်းရှိတယ် ။ Red blood cells (RBC) သွေးနီဥ ၊ ရေ ၊ (အလက်ထရိုလိုက်) ခေါ် (ဆိုဒီယမ်နှင့် ကလိုရင်း) ဓါတ်ဆားများ ၊ Protein ပရိုတင်းတို့လည်း ပါဝင်တယ် ။ အာဟာရ ၊ ဂလူးကို့စ် ၊ Lipid ခေါ် အဆီ ၊ Amino acid အမိုင်နိုအက်စစ် ၊ ကာဗွန်ဒိုင်အောက်ဆိုက် ၊ Hormones ဟော်မုန်းတွေကို သယ်ပို့ပေးနေတယ် ။
သွေး၏အခဲပိုင်းတွင် -
၁။ RBC = Red blood cell = Erythrocyte သွေးနီဥ ၊
၂။ WBC = White blood cells = Leukocytes (လူကိုဆိုက်) သွေးဖြူဥများနဲ့
၃။ Platelets (Thrombocytes) (ပလိပ်လက်) ခေါ် သွေးမှုံတို့ ပါဝင်တယ်။
RBC သွေးနီဥသည် အများဆုံးဖြစ်သည် ။ RBC သည် ပျမ်းမျှ ရက် ၁၂ဝ အသက်ရှင်သည် ။ လူ့ကိုယ်ထဲမှာ RBC ပေါင်း ၂့၅ ထွီလီယန် ရှိသည် ။ စက္ကန့်တိုင်းမှာ RBC အသစ်ပေါင်း ၂့၅ သန်း ထုတ်ပေးနေသည် ။ သွေးသည် မိုင် ၆ဝ,ဝဝဝ ခရီး သွားနေခြင်း ဖြစ်သည် ။ RBC တခုသည် ကိုယ်ခန္ဓာထဲ လှည့်လည်ရန် ၂ဝ စက္ကန့်ပင် မကြာချေ ။ WBC သွေးဖြူဥထဲတွင် Neutrophil နူထိုဖီးလ် ၊ Eosinophil အီယိုဆင်နိုဖီးလ် ၊ Basophil ဘေဆိုဖီးလ် ၊ Lumphocyte လင်ဖိုဆိုက်၊ Monocyte မိုနိုဆိုက် ၊ Macrophage မက်ကရိုဖေ့ခ်ျ ၊ တို့ပါဝင်သည် ။ Platelets (ပလိပ်လက်) အရေအတွက်သည် အချို့ ရောဂါများ Aplastic anemia, Bone marrow cancer, DHF (သွေးလွန်တုပ်ကွေး) တို့တွင် နည်းသည်။ Thrombocyto-penia ဟု ခေါ်သည် ။
WBC သွေးဖြူဥအမျိုးမျိုး
နူထိုဖီးလ် ၊ ၆၅% ၊ ဗက်တီးရီးယားတွေကို တိုက်ဖျက်ပေးတယ် ။ Pus ပြည်ထဲမှာပါတယ် ။ အီယိုဆင်နိုဖီးလ် ၊ ၄% ၊ Parasite (ပါရာဆိုက်) ခေါ် ကပ်ပါးကောင်တွေကို တိုက်ဖျက်ပေးတယ် ။ ဘေဆိုဖီးလ်၊ ၁%၊ Allergy (အလာဂျီ) ဖြစ်ရင် Histamine (ဟစ်စတမင်း) ထုတ်ပေးတယ် ။ လင်ဖိုဆိုက် ၊ ၂၅%၊ B cells (အင်တီဘော်ဒီ) Antobody ထုတ်ပေးတယ် ။ T cells ခုခံအားကိစ္စမှာပါဝင်တယ် ။ AIDS ဖြစ်ရင်နည်းသွားတယ် ။ မိုနိုဆိုက် ၊ ၆% ၊ လေစုပ်စက်လိုရှင်းပေးတယ်။ မက်ကရိုဖေ့ခ်ျ ၊ ခုခံအားအတွက် ကူညီတယ် ။
Plasma (ပလာစမာ) သွေး၏ အရည်ပိုင်းဖြစ်သည်။ သွေး၏ ၅၅% ရှိသည်။ အရေးပါသော (ပရိုတိန်း) များပါနေသည်။ ၎င်းထဲတွင် အသည်းမှထုတ်ပေးသည့် Fibrinogen (ဖိုင်ဘရင်နိုဂျင်) ခေါ် သွေးအားခဲစေသည့် ပစ္စည်းပါသည်။ (ပလာစမာ) မှ သွေးခဲစေသည့် ပစ္စည်းများ ထုတ်လိုက်ပါက Serum (စီရမ်) ကျန်ရစ်သည်။ အချို့ရောဂါ ကာကွယ်ဆေးများမှာ (စီရမ်) မှ ထုတ်ယူရသည်။
သွေးရဲ့အရည်ပိုင်း ပလာစမာက ၅၅%ရှိတယ် ။ သူ့ထဲမှာ ရေက ၉၂% ပါတယ် ။ ပရိုတင်း ၊ ဂလူးကို့စ် ၊ ဓါတ်ဆားတွေ ၊ ဖက်တီးအက်စစ် ၊ ဟော်မုန်းတွေနဲ့ ကာဗွန်ဒိုင်အောက်ဆိုက်ပါနေတယ် ။ ပရိုတင်းကို Albumin အယ်လ်ဗျူမင်လို့ခေါ်တယ် ။ ခုခံအားဆိုင်တာတွေလည်းပါနေတယ် ။ သွေးခဲစေဘို့ လုပ်ပေးတာတွေလည်း ပါတယ် ။ pH ထိန်းပေးတယ် ။ ကိုယ်အပူချိန် ထိန်းပေးတယ် ။
သွေးနီဥ ၄၅%၊ ပလာစမာ = ၅၄့၃% နဲ့ သွေးမှုံ = ဝ့၇% ရှိတယ်။ သွေးနီဥပေါင်း ယောက်ျားတယောက်မှာ ၄့၇ ကနေ ၆့၁ သန်း၊ မိန်းမတယောက်မှာ ၄့၂ ကနေ ၅့၎ သန်းရှိတယ်။ သွေးဖြူဥ ၄ဝဝဝ ကနေ ၁၁ဝဝဝ ရှိတယ်။ သွေးမှုံပေါင်း ၂ သိန်းကနေ ၅ သိန်းရှိတယ်။
သွေးဟာကိုယ်အလေးချိန်ရဲ့ ၇% လေးတယ်။ သွေးထဲမှာပါတဲ့ Haemoglobin ဟီမိုဂလိုဘင်က အရေးကြီးတယ်။ ရှူတဲ့လေထဲကအောက်စီဂျင်ကို ဆဲလ်တွေဆီပို့ပေးတယ်။ ABO သွေးအုပ်စုခွဲနည်းကို ၁၉ဝဝ-၁၉ဝ၇ ကတည်းက သိလာခဲ့တယ်။ Rhesus factor ကိုတော့ ၁၉၃၇ ရောက်မှသိလာတယ်။
ဒေါက်တာတင့်ဆွေ
https://www.facebook.com/drtintswe/
