" ဘုရားသခင်ကို ကျေးဇူးတင်ဖို့ အမှောင်ထဲကလူတစ်ယောက်ကို မင်းရဲ့ အမြင်အာရုံနဲ့ လက်ကမ်းကူညီ နိုင်တာထက် ပိုကောင်းတဲ့ နည်းလမ်းမရှိဘူး " ....... ဟယ်လင်ကဲလာ
ကျွန်တော်တို့ရဲ့ မျက်လုံးဟာ အမှောင်ထဲမှာ နေရတဲ့အခါ မမြင်ရတဲ့အခါ သိပ်ကြောက်လန့် စရာကောင်းတယ်လို့ ခံစားရပါတယ် ။ အဲ့ ဒီလိုမျိုး တစ်နေ့လုံး တစ်ညလုံး ပြီးတော့ တစ်ဘဝလုံး အမှောင်နဲ့ နေထိုင်ရတဲ့ သူတွေက ပိုကြောက်စရာကောင်းမှာပါပဲ မဟုတ်လား ။ မျက်ကြည်လွှာဆိုတဲ့ မျက်လုံးက တစ်ရှုး အကြည်လေးအကြောင်း သင်သိပါသလား ??
မျက်လုံးရဲ့ အရှေ့ပိုင်း ( ကျွန်တော်တို့ မြင်နေရတဲ့ အပိုင်းလေး ) ကို ဖုံးအုပ်ထားတဲ့ တစ်ရှုး အကြည်လေးကို မျက်ကြည်လွှာလို့ ခေါ်ပါတယ် ။
သူက မျက်လုံးထဲကို အလင်းဝင်ဖို့ အလင်းယိုင်ဖို့ တွေအတွက် ပြူတင်းပေါက်လေးပါပဲ ။
မျက်ကြည်လွှာ ဘာကြောင့်ပျက်စီးတာပါလဲ ?
ရောဂါကြောင့်ဖြစ်စေ ၊ ထိခိုက်ဒဏ်ရာရလို့ ဖြစ်စေ ၊ ပိုးဝင်လို့ ဖြစ်စေ ၊ အက်ဆစ် စတဲ့ ဓာတု ပစ္စည်းတွေ နဲ့ထိခိုက်ခံရလို့ဖြစ်စေမွေးရာပါ မျက်ကြည်လွှာ ပျက်စီးလို့ ဖြစ်စေ ကလေး သူငယ်တွေ မှာ အာဟာရ ချို့တဲ့လို့ ဖြစ်စေ မျက်လုံးအမြင်ကွယ်တာမျိုးဖြစ်နိုင်ပါတယ် ။ မျက်ကြည်လွှာ ကန်းခြင်း ( corneal blindness ) လို့ခေါ်ပါတယ် ။
ဘဝကို ရှေ့မှာ အကြာကြီးဆက်လျှောက်ရမဲ့ လူငယ်တွေ ကလေးသူငယ်တွေမှာ အဖြစ်များပါတယ်။
မျက်ကြည်လွှာ လှုတယ် ဆိုတာ ဘာပါလဲ ?
သေလွန်ပြီးတဲ့အခါ မျက်လုံးရဲ့ မျက်ကြည်လွှာကို (မ်ိမိက ကြိုတင်လှုဒါန်းခဲ့ရင် ဖြစ်စေ ၊ သေသူမိသားစုရဲ့ ခွင့်ပြုချက်နဲ့ဖြစ်စေ ) လှုဒါန်းတာပဲ ဖြစ်ပါတယ်။ တကယ်လို့ နေ့စဉ်သေလွန်သမျှ လူတွေသာ မျက်ကြည် လွှာ လှုမယ်ဆိုရင် မျက်ကြည်လွှာကြောင့် ကန်းတဲ့ မျက်မမြင်တွေ အကုန်လုံးဟာ တစ်ပတ်အတွင်း မှာ ပြန်လည် မျက်စိမြင်နိုင်ကြလိမ့်မယ်လို့ လည်း ပညာရှင်တွေက ခန့်မှန်းတွက်ချက်ပြကြပါတယ်။
ဘယ်သူတွေက မျက်ကြည်လွှာ လှုလို့ရပါသလဲ ??
အသက်အရွယ် ၊ ကျားမ မရွေး ၊ သွေးအုပ်စုမရွေး ပြီးတော့ လူမျိုး ဘာသာ မရွေး လှုဒါန်းလို့ရပါတယ်။
မျက်စိတိမ်စွဲနေတဲ့သူ ၊ မျက်မှန်တပ်ထားတဲ့ သူလည်း လှုဒါန်းလို့ရပါတယ် ။ သွေးတိုးရောဂါ ဆီးချိုရောဂါ ဝေဒနာရှိသူတွေလည်း မျက်ကြည်လွှာ လှုဒါန်းလို့ရပါတယ်။
ဘယ်သူတွေက မျက်ကြည်လွှာ လှုလို့ မရပါဘူးလဲ ??
အသည်းရောင် အသားဝါ ဘီပိုး စီပိုး ရှိသူတွေ AIDS ဝေဒနာရှင်တွေ ဦးနှောက် အမြှေးရောင်ရောဂါ ( encephalitis , meningitis ) ခွေးရူးပြန်ရောဂါ ဘက်တီးရီးယားပိုး ဗိုင်းရပ်စ်ပိုး မှို စသည့် ပိုးမွှားများကြောင့် သွေးဆိပ်သင့်ခြင်း (septicemia ) သွေးကင်ဆာ ( Leukaemia )
lymphoma ခေါ် ပြန်ရည်ကျိတ်ကင်ဆာ မွေးရာပါဗီဇချို့ယွင်းချက်ကြောင့်ဖြစ်သော ကလေး မျက်စိမြင်လွှာ ကင်ဆာ ( retinoblastoma ) နောက်ဆုံး အဆင့် ကင်ဆာရောဂါရှင်များ အာရုံကြော ထိခိုက်တဲ့ လူတွင် တွေ့ရသော Creutzfeldt~jacod syndrome အာရုံကြောအားနည်း ကူးစက်နွားရူးရောဂါ စတဲ့ ရောဂါရှိသူတွေ လှုလို့မရပါဘူး ။
မျက်ကြည်လွှာကို ဘယ်အချိန်မှာ ထုတ်ယူမှာပါလဲ ???
သေဆုံးပြီး ၆နာရီကနေ ၈နာရီအတွင်းမှာ ထုတ်ယူမှာ ဖြစ်ပြီး ထုတ်ယူချိန်ကတော့ ၁၅မိနစ်ကနေ မိနစ် ၂၀အထိပဲ ကြာမြင့်ပါတယ် ။ လှုဒါန်းသူရဲ့ မျက်နှာသွင်ပြင် ပျက်စီးခြင်း မရှိပါဘူး ။ မျက်ကြည်လွှာကို ထုတ်ယူပြီးတဲ့အခါမှာ မျက်စိဘဏ်မှာ စမ်းသပ်စစ်ဆေးပြီး ၉၆ နာရီ ( ၄ရက် ) အတွင်းမှာပဲ မျက်ကြည်လွှာ အစားထိုးကုသလို့ ရနိုင်ပြီး မျက်ကြည်လွှာကန်းသူတွေ ပြန်လည်မြင်နိုင်ပြီ ဖြစ်ပါတယ် ။ မျက်စိဘဏ်ကို လူသားအင်္ဂါ အစိတ်အပိုင်း အစားထိုးကုသမှုဆိုင်ရာ တာဝန်ရှိသူများက ထိန်းချုပ်ထားပြီး ရောင်း ဝယ်ဖောက်ကားခွင့် မရှိပါဘူး ။ ရာဇဝတ်မှုမြောက်ပါတယ်။
သေသူရဲ့ ဆန္ဒကိုသိရှိပြီးတဲ့ နောက်မှာ သေဆုံးပြီး ချိန်မှာ ဘာတွေလုပ်ရမှာပါလဲ ?
၆နာရီအတွင်း မျက်စိဘဏ်မှ တာဝန်ရှိသူတွေကို အကြောင်းကြားပါ ။ လေထုခြောက်သွေ့စေတဲ့ ပန်ကာ စတာတွေကို ပိတ်ထားပြီး လေထုအေးမြစိုထိုင်းစေတဲ့ လေအေးစက် air cooler , air con တွေကိုတော့ ဖွင့်ထားပေးပါ ။ ခေါင်းအုံးနဲ့ ခေါင်းကို အနည်းငယ် မြှင့်ထားပေးပါ ။ ရေဆွတ်ထားတဲ့ ဂွမ်းစကို ပိတ်ထားတဲ့ မျက်လုံးပေါ်မှာ အုပ်ထားပေးပါ။
#လွဲမှားတဲ့ အယူအဆများ
မျက်နှာ ဟာ မျက်ကြည်လွှာထုတ်ယူလို့ ပျက်စီးသွားမယ် နောက်ထပ်မွေးဖွားလာမဲ့ ဘဝမှာ မျက်လုံးအမြင်မရဘဲ မွေးဖွားလာမယ် သက်ဆိုင်ရာ ဘုရားသခင်တွေကို မမြင်နိုင်တော့ဘူး
မေးခွန်းတွေ
#မျက်ကြည်လွှာကို အသက်ရှင်နေတဲ့ အလှုရှင်ဆီက ထုတ်ယူမှာလား ?
မဟုတ်ပါဘူး ။ အလှုရှင်သေလွန်သွားတဲ့အခါမှသာ အစားထိုးကုသဖို့ မျက်ကြည်လွှာကို ထုတ်ယူမှာ ဖြစ်ပါတယ် ။
#မျက်လုံးတစ်လုံးလုံး အစားထိုးမှာလား ?
မဟုတ်ပါဘူး
မျက်ကြည်လွှာကိုပဲ အစားထိုး ကုသမှာ ထုတ်ယူမှာ ဖြစ်ပါတယ်။
#ခွဲစိတ်ကုသမှု နာမည်ကို ဘာလို့ ခေါ်ပါသလဲ
မျက်ကြည်လွှာ အစားထိုးကုသခြင်း ( cornea grafting ) လို့ ခေါ်ပါတယ်။ တစ်ချို့ခွဲစိတ်ကုသမှုတွေမှာ မျက်ကြည်လွှာတစ်ခုလုံးကို အစားထိုးကုသဖို့ လိုအပ်ပြီး တစ်ချို့မှာတော့ မျက်ကြည်လွှာရဲ့ အတွင်းဆုံး အလွှာလေးကိုပဲ အစားထိုး ကုသတာဖြစ်ပါတယ် ။
#အောင်မြင်နိုင်ချေ
မျက်ကြည်လွှာ အစားထိုးကုသတာက ၉၅ ရာခိုင်နှုန်း အောင်မြင်နိုင်ပါတယ်။ အများအားဖြင့် သွေးအုပ်စု တူ မတူဆိုတာလည်း စစ်ဆေးဖို့ မလိုပါဘူး ။ မျက်ကြည်လွှာဟာ သွေးထောက်ပံ့မှု မရှိတဲ့ မလိုတဲ့ အင်္ဂါမို့ပါ။ မျက်ကြည်လွှာဟာ သူ့အတွက်လိုအပ်တဲ့ အောက်စီဂျင်ကို လေထဲက ရယူပါတယ် ။ ဒါကြောင့် မိမိခန္ဓာကိုယ်မှပစ္စည်းမဟုတ်သောကြောင့် ပြန်လည် တုန့်ပြန်ခြင်း ( rejection ) ဖြစ်ဖို့ အခွင့် အလမ်း နည်းပါးပါတယ်။
#ဘယ်အသက်အရွယ်ကနေ စပြီး မျက်ကြည်လွှာ လှုလို့ ရပါသလဲ ?
အသက် ၂နှစ်ကနေ ၇၅ နှစ်အတွင်း လှုလို့ ရပါတယ်။ ကလေးငယ်တွေကတော့ မိဘ အုပ်ထိန်းသူက ခွင့်ပြုပြီး လှုဒါန်းတာမျိုးပေါ့ ။
#မျက်ကြည်လွှာ လှုစရာရှိလို့ ဆရာဝန်က ကျွန်တော့်ရဲ့ အသက်ကို ခက်ခက်ခဲခဲ မကယ်တော့ဘူးလား ?
မဟုတ်ပါဘူး။ ဆရာဝန်တွေဟာ အသက်ကို ကယ်ဖို့ ဦးစားပေး မြှုပ်နှံကြသူတွေပါ။ အဓိက ဦးစားပေးဟာ လူနာကို အသက်ကယ်ဖို့ ဖြစ်ပြီး သေလွန်ပြီးမှသာ အင်္ဂါ အစားထိုးဖို့ အလှုခံဖို့ တောင်းဆိုမှာပါ။
#ဘာသာရေးအမြင်
ဘာသာတရားအများစုဟာ တစ်ရှုး အင်္ဂါ လှုဒါန်းဖို့ကို မွန်မြတ်တဲ့ အလုပ်အဖြစ် သတ်မှတ်ထား ခွင့်ပြုထားကြပါတယ်။ တစ်ပါးသူရဲ့ ဘဝကို ကယ်တင်ရာရောက်တဲ့ အတွက်ပါပဲ ။
ယနေ့ခေတ်မှာ ထင်ရှားတဲ့ အနုပညာရှင်တွေ ပရဟိတလူငယ်မောင်မယ်တွေဟာ မျက်ကြည်လွှာ အလှုကို ပြုလုပ်နေကြပါတယ်။ ဘောလိဝုဒ်စတား များဖြစ်တဲ့ အမီတာ ဘာချမ်း ၊ မင်းသမီးကြီး ဟီမာ မီလီနီ တို့ဟာလည်း မျက်ကြည်လွှာ လှုဒါန်းထားသူများ ဖြစ်ပါတယ်။ နှစ်စဉ် US မှာ မျက်ကြည်လွှာ အစားထိုးကုသမှုပေါင်း ၄၆၀၀၀ ကျော်ကို လုပ်ဆောင်နေလျက်ရှိပါတယ် ။
တစ်စုံတစ်ယောက်ရဲ့ ကမ္ဘာကိုလင်းစေပါ
သင့် မီးအိမ်လေးကို လက်ဆင့်ကမ်းလိုက်ပါ ။
ခွန်းညိုသွေး
Health Guide
https://www.facebook.com/healthguidemyanmar
