သုတေသီများက ဆီးကြိတ်ကင်ဆာနှင့် ဗီတာမင်(D)တို့ကြား ခိုင်မာအားကောင်းစွာ ဆက်နွယ်မှု ရှိနေသည်ဟု ယုံကြည်လျှက် ရှိသည်။ “ဗီတာမင်(D) အားနည်းချို့တဲ့သွားတဲ့အခါ ဆီးကြိတ်မှာ အကြိတ်တွေ ဖြစ်ပေါ်စေတဲ့ ဇီဝဖန်တီးမှုတွေက ပိုအားကောင်းလာတယ်။ ဒီတွေ့ရှိချက်ဟာ အမျိုးသား တော်တော်များများကို လေ့လာပြီး တူညီတဲ့ ကောက်ချက်အဖြစ် သတ်မှတ်နိုင်ခဲ့ပါတယ်”ဟု ဦးဆောင်သုတေသီ ဒေါက်တာ အဒမ်မာဖီက ပြောကြားခဲ့သည်။ ၎င်းက “နောက်ထပ် သုတေသန လုပ်ငန်းတွေတော့ ဆက်လုပ်ဖို့ လိုနေဦးမှာပါ။ ဒါပေမဲ့ အမျိုးသားတွေ အနေနဲ့ ဗီတာမင်(D) ပြတ်လပ်မှုကို အဖြစ်မခံတာဟာ ပညာရှိ နည်းလမ်းနဲ့ လုပ်ဆောင်မှု တစ်ခုအဖြစ် ကျွန်တော်တို့ အကြံပြုချင်ပါတယ်”ဟုလည်း မှတ်ချက်ပေးခဲ့သည်။
ဗီတာမင်(D)သည် နေရောင်ခြည် ခံယူခြင်းကဲ့သို့ နည်းလမ်းမျိုးဖြင့် အရေပြားမှတစ်ဆင့် စုဆောင်းဖြည့်တင်းနိုင်သည်။ ဒေါက်တာမာဖီက “ဗီတာမင်(D) ချို့တဲ့မှုဟာ လူဖြူတွေထက်စာရင် အသားရောင်ရင့်တဲ့ အမျိုးသားတွေမှာ ပိုပြီး အဖြစ်များလေ့၊ သက်ရောက်လေ့ရှိတယ်။ ကျွန်တော်တို့ လေ့လာမှုတွေအရ အာဖရိကဖွား အမေရိကန်တွေက ဆီးကြိတ်ကင်ဆာ ဖြစ်နိုင်ခြေ ပိုများတတ်တာကိုလည်း တွေ့ရှိရပါတယ်။ ပြောရရင်တော့ ခန္ဓာကိုယ်ရဲ့ဗီတာမင်(D) ပမာဏကို နှစ်စဉ် ဆန်းစစ်နေတာမျိုး လုပ်သင့်တယ်။ တကယ်လို့ ဗီတာမင်(D) ယုတ်လျော့အားနည်းနေတယ် ဆိုရင်တော့ ဆရာဝန်နဲ့ ဆွေးနွေးပြီး သင့်တင့်တဲ့ အားဖြည့်မှုမျိုး ပြုလုပ်သင့်ပါတယ်”ဟုလည်း အကြုံပြုသွားခဲ့သည်။
Planet Myanmar Network.
