မောရ၀တီ အသင်းနှင့် မြ၀တီ အသင်းတို့ပွဲတွင် ကစားသမား အချင်းချင်း ခိုက်ရန်ဖြစ်ပွား

 စမ်းချောင်းမြို့နယ်၊ ပဒုမ္မာဘောလုံးကွင်း၌ ကစားခဲ့သည့် မြန်မာနေရှင်နယ်လိဂ် - ၂ ပွဲစဉ် ၁၀ ပွဲကျန်တစ်ပွဲဖြစ်သည့် မောရ၀တီအသင်းနှင့် မြ၀တီအသင်းတို့ပွဲတွင် ကစား သမား အချင်းချင်း ခိုက်ရန်ဖြစ်ပွားမှုများ ဖြစ်ခဲ့သည်။

ပွဲပြီးခါနီးအချိန်တွင် မောရ၀တီအသင်းခေါင်းဆောင် ခွန်မျိုးမင်းနှင့် မြ၀တီအသင်း ခေါင်းဆောင် ဇော်ဇင်ထက်တို့၏ အချင်းများမှ ပြဿနာ စတင်ခဲ့ပြီး ကွင်းလယ်ဒိုင်လူကြီးနှင့် စည်းကြပ် ဒိုင်များမှ ၀င်ရောက် ဖျန်ဖြေခဲ့ရသည်။ အချင်းများမှုအပေါ် ကွင်းလယ်ဒိုင် လူကြီးမှ အ၀ါကတ်ပြ သတိပေးခဲ့ပြီး အဆိုပါအရေးယူမှုနှင့်အား မကျေနပ် ၍ မောရ၀တီ အသင်း အုပ်ချုပ်သူ ဦးကျော်စိုးမိုးက ကွင်းလယ် ဒိုင်လူကြီးအား အပြင်းအထန် စောဒက တက်ကာ ထိုးကြိတ်မည့် အပြုအမူများပြုလုပ်ခဲ့သည်။ နေရှင်နယ်လိဂ် ပထမ အကျော့ နောက်ဆုံး ပွဲစဉ် ဟံသာဝတီ အသင်းနှင့် ရခိုင်ယူနိုက်တက် အသင်းတို့ပွဲစဉ်တွင် ခိုက်ရန် ဖြစ်ပွားမှုများ ဖြစ်ခဲ့သလို Ooredoo cup ဒုတိယအဆင့် ဟံသာဝတီ အသင်းနှင့် မောရ၀တီ အသင်းတို့ ပွဲတွင်လည်း ကစားသမား ခိုက်ရန် ဖြစ်ပွားမှုများ ရှိခဲ့သည်။

ထို့ပြင် ယခု မောရ၀တီ အသင်းနှင့် မြ၀တီ အသင်းတို့ ပွဲစဉ်တွင်လည်း ကစားသမား အချင်းချင်း ထပ်မံ ခိုက်ရန် ဖြစ်ပွား ခဲ့ခြင်း ဖြစ်သည်။ ပြဿနာ ဖြစ်ပွား ခဲ့သည့် ဘောလုံး ပွဲစဉ် သုံးပွဲစလုံးသည် ပဒုမ္မာ အားကစားကွင်း၌ ကျင်းပခဲ့သည့် ပွဲစဉ်များဖြစ်ပြီး ပဒုမ္မာကွင်းသည် ပရိသတ် ပွဲကြည့်စင်နှင့် ဘောလုံးကွင်း အလွန်နီးကပ်သဖြင့် ဒိုင်လူကြီးများ အနေဖြင့်လည်း ပရိသတ်များ၏ ဖိအားပေး အော်ဟစ်မှုများစွာ ခံရလေ့ရှိသည်။

Mizzima - News in Burmese