မနေ့ကလည်း တယောက်ကမေးသေးတယ်။ အခုတယောက်။ အရင်ကလည်း မေးကြတယ်။
၁။ မင်္ဂလာပါဆရာ၊ အသက် ကတော့ ၂၂ နှစ်ပါ၊ ကျားပေါ့။ ၃ နှစ် ၅နှစ် လောက်မှာ အတက်ရောဂါ ဖြစ်ပါတယ်ဆရာ။ တစ်နေ့ကို သုံးလေးခါလောက်ဖြစ်တယ်ဆရာ။ ၇ လောက်မှာပျောက်သွားတယ်ဗျ။ ပြီးတော့ ၁၁ နှစ်လောက်မှာတခါ ပြန်ဖြစ်တယ်ဗျ။ ၃ နှစ်လောက်ဖြစ်ပြီး Carbamazepine ဆေးသောက်ခိုင်းပြီး ပြန်မဖြစ်တော့ဘူးဗျ။ ဒါမေမဲ့ တခါတခါ ဘယ်လိုပြောရလဲ အကြောဆွဲတဲ့အဆင့်တော့မဟုတ်ဘူးဗျ။ အသိစိတ်ကနေ ဖြစ်နေတယ် ပြောပြရခက်တယ်ဗျ။ ညညဆို ညည်းတွားတယ်ဗျ။ ဆေးကတော့ နေ့တိုင်းသောက်နေရတုန်း ညည ဘာကြောင့်ညည်းတာလဲ ပြန်ဖြစ်နိုင်လား ဒီထက်ကောင်းတဲ့ဆေးရှိလားး ထိုးဆေးတို့ ကျေးဇူးပြုပြီး အကြံပေးပါဦးဆရာ။
၂။ မင်္ဂလာပါဆရာ ကျွန်မသမီးလေးက ၁ နှစ်ပါဆရာ။ သမီးလေး ၆ လထဲကစပြီး အတက်ရောဂါဖြစ်နေတယ်ဆရာ။ ကလေးဆေးရုံတင်လိုက်တော့ ကလေးကဖျားလို့တက်တာတဲ့ ၆ နှစ်အထိ အဲ့လိုဖျားတိုင်းတက်မယ်လို့ ပြောလိုက်တယ်ဆရာ။ ကျမလဲ အမြဲဂရုစိုက်တယ်။ နောက်ပိုင်း ကလေးက မဖျားလဲတက်တက်လာတယ်ဆရာ။ တလတခါ အခုဆို တပတ်တခါလောက်ကို တက်တက်နေတယ်ဆရာ။ သူတက်ရင် မျတ်လုံးက အပေါ်ကိုလန်တယ်။ လက်တွေဆုပ်တယ်။ ခြေချောင်းလေးတွေကုပ်တယ်။ နှုတ်ခမ်းလေးတွေပြာတယ်။ သွားတွေစေ့သွားတယ်။ လျှာကိုက်မိမှာစိုးလို့ အရင်ကဆို ကျမ လက်ချောင်းလေးထည့်ထားပြီး သူ့ပါ့စပ်ထဲကိုထည့်ထားပေးတယ်ဆရာ။ နောက်ပိုင်း သွားပေါက်လာတော့လက်ထည့်တာ အရမ်းကိုက်တော့ မထည့်နိုင်တော့ဘူးဆရာ။ ကျေးဇူးပြုပြီးဖြေပေးပါဆရာ။
ဆောရီး။ မေးခွန်း နှစ်ခုလုံးက ပို့စ်မှာသုံးမှာဖြစ်လို့ သတ်ပုံတွေ ပြင်လိုက်ပါတယ်။ တစ်လတစ်ခါ၊ တစ်ပတ်တစ်ခါ။
ကမ္ဘာမှာ ဒီရောဂါသည်ပေါင်း သန်း ၅ဝ ရှိတယ်။ ၉ဝ% က ဖွံ့ဖြိုးဆဲတိုင်းပြည်တွေမှာ နေကြတယ်။ ရောဂါခွဲ အမျိုးအစားပေါင်း ၄ဝ ရှိတယ်။ အရင်တုံးက ကျိန်စာသင့်ခံရသူလို့ ယူဆခံခဲ့ကြရတယ်။ ဆိုးဝါးလွန်းတဲ့ စိတ်ဝေဒနာသည်တွေ၊ ကုမရတဲ့ဆစ်ဖလစ်ရောဂါသည်တွေနဲ့အတူ သူတို့ကို ချုပ်နှောင်ထားခဲ့ဘူးတယ်။ အခုထိလဲ တန်ဇန်နီးယားနဲ့ တခြားအာဖရိကနိုင်ငံတွေမှာ မကောင်းဆိုးဝါး ပြုစားခံရသူတွေလို့ မှတ်ယူကြတုံးဘဲ။
အတက်ရောဂါဟာ ဦးနှောက်ရောဂါတခု ဖြစ်တယ်။ စိတ်ရောဂါ မဟုတ်ပါ။ Neurons ဆိုတဲ့ အာရုံကြောအစုကနေ မှားတဲ့ သတင်းအချက်အလက်တွေ ပို့လွှတ်လိုက်လို့ မတော်တဲ့ အာရုံခံမှု၊ စိတ်ထဲဖြစ်ပေါ်မှုနဲ့ ကြွက်သားတွေ ပြင်းပြင်းထံထံ ကွေးဆန့်စေပြီး၊ သိတိလက်လွတ်ဖြစ်စေတယ်။
ဖြစ်စေတဲ့ အကြောင်းခံတွေ များတယ်။
- ဖျားနာတာ၊
- ဦးနှောက် ထိခိုက်မိတာ။
- ဦးနှောက် ဖွံ့ဖြိုးမှု မမှန်တာ၊ (မေးခွန်းထဲက ကလေး အဲဒါဖြစ်တာနေမယ်။)
- ပတ်ဝန်းကျင်ကို သတိမမူတဲ့ စိတ်ရောဂါဖြစ်တောထဲမှာ ဒီရောဂါလဲပါနေတယ်။
- တခြားဟာတွေပါ ရှိနိုင်တယ်။
• ကုသတာ ချက်ချင်း လုပ်ရတယ်။
• တခါလောက် တက်တာနဲ့တော့ ဒီရောဂါလို့ ပြောမရသေးဘူး။
• မကူးစက်ပါ။
• ဖျားလို့တက်တာလို တခါတက် တခါ ဦးနှောက်ကို ထိခိုက်မှာ မဟုတ်ပါ။
• မတက်သ၍ လုံးဝလူကောင်းပါဘဲ။
အတူနေ၊ အတူသွား၊ အတူကစား၊ အတူစာသင်ကြားသူများ သိထားရမယ်။ တက်တယ်ဆိုရင် ဘေးကလူတွေ ပြာပြာသလဲ မဖြစ်ပါနဲ့။ ဖြစ်နေတဲ့လူကို နေရာ မရွေ့ပါနဲ့။ သူလှုတ်ရှားနေသမျှ ရပ်တန့်အောင် လုပ်ဘို့ မကြိုးစားပါနဲ့။ သူပြန်သတိရလာအောင်ဆိုပြီး အော်ပြီး ခေါ်မနေနဲ့။ အတင်းနှိပ်-ချိုးတာ မလုပ်ပါနဲ့။ သူ လိမ့်ကျမှာ ထိခိုက်မှာ စတာတွေသာ ဖယ်ရှာပေးပါ။ သူ့ကို ဘေးတဖက်လှည့်ပေးပါ။ ပါးစပ်ထဲက ထွက်တာ၊ အန်တာတွေ သူ့လေလမ်းထဲ ဝင်မသွားအောင် ဖြစ်ပါတယ်။ ခေါင်းအုံးစရာတခုခု လုပ်ပေးပါ။ သူ့ပါးစပ်ကို အတင်းဟဘို့ မကြိုးစားပါနဲ့။ ပါးစပ်ထဲ တခုခုထည့်ဘို့ မလုပ်ပါနဲ့။ (ဒါက နောက်ဆုံး လက်ခံတဲ့နည်း ဖြစ်တယ်။ အရင်က လျှာမကိုက်မိအောင် ပါးစပ်ထဲကို တခုခု ထည့်ပေးတယ်။ ဂျူလီယက်ဆီဇာမှာ ဒီရောဂါရှိလို့ အဲလိုလုပ်တာကို ကလီယိုပက်ထရာ ဇာတ်ကားထဲမှာပါတယ်။
အတက်မှန်သမျှ အများစုဟာ မသေစေပါ။ ဆရာဝန် ပြေးခေါ်စရာတောင် မလိုတတ်ပါ။ ၅ မိနစ်နေလို့မှ သတိမရ-အတက်မရပ်ရင် ခေါ်ပါ။ သူအတက်ရပ်ရင် စိတ်တွေ ရှုတ်ထွေး၊ မကြည်မလင် ဖြစ်နေလိမ့်မယ်။ အသာအိပ်ပါ၊ နားပါစေ။ ဆေးဆောင်ထားပါ။ နေ့တိုင်း သောက်သင့်တယ်။ နေ့တိုင်း သောက်ရမဲ့ ဆေးကို မေ့သွားရင် သတိရချိန်မှာသောက်ပါ။ ဒီနေ့တက်လို့ ပိုသောက် စရာမလိုပါ။ ဆရာဝန်ကလိုမှ တိုးပေးပါလိမ့်မယ်။
အသိအမှတ်ပြုထားတဲ့စားဆေး (၂ဝ) ရှိတယ်။ Carbamazepine (Tegretol), Clorazepate (Tranxene), Clonazepam (Klonopin), Ethosuximide (Zarontin), Felbamate (Felbatol), Fosphenytoin (Cerebyx), Gabapentin (Neurontin), Lacosamide (Vimpat), Lamotrigine (Lamictal), Levetiracetam (Keppra), Oxcarbazepine (Trileptal), Phenobarbital (Luminal), Phenytoin (Dilantin), Pregabalin (Lyrica), Primidone (Mysoline), Tiagabine (Gabitril), Topiramate (Topamax), Valproate semisodium (Depakote), Valproic acid (Depakene), and Zonisamide (Zonegran).
EEGs and brain scans လုပ်ပြီး စစ်ကြည့်တယ်။ ပျောက်အောင်တော့ မလုပ်နိုင်ပါ။ ထိန်းလို့ရပါတယ်။ ဆေးတွေနဲ့မရရင် ခွဲစိတ်တာလဲ လုပ်ပါသေးတယ်။ Vagus nerve stimulation နည်းက ရင်ပတ်မှာ တပ်ပေးမဲ့ ကရိယာလေးကနေ လျှပ်စစ်ပို့ပေးနေမယ်။
ကိုယ်ဝန်ဆောင်ချိန် အတက်ကြမ်းရင် အထဲကကလေး ထိခိုက်နိုင်တယ်။ အတက်ဆေးတွေကလဲ ကလေးဆီ ရောက်လို့ ဆရာဝန်နဲ့ ညှိရမယ်။ အတက်ရပ်ဆေးတချို့နဲ့ ကိုယ်ဝန်တားဆေး တွဲမရေးရတာရှိတယ်။
တချို့နိုင်ငံတွေမှာ ဒီရောဂါရှိရင် ကားမောင်းခွင့် မပေးဘူး။ အင်းယားကန်မှာ ရေကူးတယ်လို့ သတင်းထွက်ခဲ့တဲ့ ဂျွန်ဝီလျှံယက်တော ဝက်ရူးပြန် ရောဂါကြောင့် အင်းစိန်ထောင်ကနေ ရန်ကုန်ဆေးရုံကြီး ဦးနှောက်နဲ့ အာရုံကြောဌာန ကိုဆေးလာကုသေးသတဲ့။ မြန်မာတိုင်းရင်းဆေးနည်းတွေမှာ မြင်းခွာရွက်၊ သနပ်ခါးအရွက်၊ ငှက်ပျောသီးတွေသုံးတာ ဖတ်ရတယ်။ အစားအစာ အရေးပါတယ်။ Ketogenic diet ခေါ်တယ်။ High in fat and low in carbohydrates အဆီ များပြီး၊ ကယ်လိုရီနဲတာ စားရတယ်။
ဝက်ရူးပြန်ဆိုတဲ့ မြန်မာလို အခေါ်ကိုလဲ ပြောင်းသင့်တယ်။ ဟစ်ပိုခရေးတီးစ်ကတော့ ဝက်ရူးပြန်ရောဂါကို လူတွေ နားလည်လာကြတဲ့ တနေ့ကြရင် ဘုရားသခင်အလိုအရဖြစ်ရတာဆိုတာ သိလာပါလိမ့်မယ်တဲ့။
Elastic epilepsy အတက်ရောဂါတမျိုး http://doctortintswe.blogspot.com/2015/10/elastic-epilepsy.html
Epilepsy အတက်ရောဂါ http://doctortintswe.blogspot.com/2016/11/epilepsy-1.html
Seizure First Aid တက်နေသူကို ရှေးဦးသူနာပြုစုခြင်း http://doctortintswe.blogspot.com/2017/03/seizure-first-aid_9.html
Dr. တင့်ဆွေ
https://www.facebook.com/drtintswe/
