မျိုးဆက်ပွား စနစ်
အသက် ၂၀ ဝန်းကျင် အရွယ်က မျိုးဆက် ပွားဖို့အတွက် အဖွံ့ဖြိုးဆုံး အချိန်ပါ။ အမျိုးသမီး အများစုက သူတို့ အစစအရာရာ အဆင်ပြေတဲ့ အထိ ကလေးယူဖို့အရေးကို နှောင့်နှေး နေတတ် ပါတယ်။ ဒါကြောင့် အိမ်ထောင်ပြု ထားတဲ့ စုံတွဲတွေက ပဋိသန္ဓေ တားဆေး သောက်ဆေးကို မှီဝဲ တတ်ပါတယ်။ အဲဒီဆေး သောက်နေရင် ဗီတာမင် B1၊ B2၊ B12၊ ဗီတာမင်စီနဲ့ ဇင့်၊ မဂ္ဂနီ ဆီယမ်တို့လို သတ္တုဓာတ်တွေကို မှီဝဲဖို့ လိုပါတယ်။ ဗီတာမင် B6 ကလည်း ရာသီမလာခင် စိတ်ပိုင်းဆိုင်ရာ ဝေဒနာတချို့ကို ခံစားရတတ်တဲ့ အမျိုးသမီး တွေအတွက် သင့်တော်ပါတယ်။ ရာသီလာစဉ် နာကျင်မှုနဲ့ ရင်သားတင်း တာတွေကို သက်သာစေဖို့အတွက် EPO (Evening Primose Oil) ကို မှီဝဲပေးနိုင်ပါတယ်။
မျိုးအောင်ခြင်း
မျိုးဆက်ပွားစနစ် ကျန်းမာရေး ကောင်းနေဖို့အတွက် စိတ်ပိုင်း၊ ရုပ်ပိုင်းနဲ့ ခံစားမှုပိုင်းအားလုံး ကျန်းမာနေဖို့ လိုပါတယ်။ အဲဒီလို ကျန်းမာဖို့အတွက် အာဟာရအပေါ်လည်း မူတည်နေပါတယ်။ ကလေးယူမယ်လို့ ကြိုတင် စဉ်းစားထားချိန်မှာ အမျိုးသားရော အမျိုးသမီးကပါ ကျန်းမာ ကြံ့ခိုင် နေအောင် ကြိုးစားထားသင့်ပါတယ်။ စီးကရက်မီးခိုး မရှူမိအောင်၊ အယ်လ်ကိုဟောနဲ့ ကဖင်းဓာတ်ကို အလွန်အမင်း မသောက်ဖြစ်အောင် သတိထားရပါမယ်။ ကျန်းမာရေးကောင်းတဲ့ သုက်ကောင်ရဖို့ မျှတ ကောင်းမွန်တဲ့ အာဟာရ စားပေးဖို့ လိုပါတယ်။ သွပ်(ဇင့်)ဓာတ်က မျိုးဆက်ပွား ကျန်းမာရေးအတွက် အထူးသဖြင့် အမျိုးသားတွေမှာ အရေးပါတဲ့ သတ္တုဓာတ်တစ်မျိုး ဖြစ်ပါတယ်။ အမျိုးသမီးတွေအနေနဲ့ ဖောလစ်အက်စစ်နဲ့ အိုင်အိုဒင်းလို အရေးကြီး အာဟာရတွေ အလုံအလောက် မှီဝဲသင့်ပါတယ်။ စိတ်ဖိစီးမှု၊ အာဟာရချို့တဲ့မှု၊ ကော်ဖီနဲ့ အရက်ကို အလွန်အမင်း သောက်တာ၊ အဝလွန်တာနဲ့ ပိန်လွန်းတာ တွေဟာလည်း ကလေးရဖို့ ခက်ခဲတတ်ပါတယ်။
စွမ်းအင် ထိန်းသိမ်းခြင်း
အာဟာရချို့တဲ့မှုကြောင့် စွမ်းအင်က လျော့နည်း သွားတတ် ပါတယ်။ ဗီတာမင်ဘီ အုပ်စုဟာ စွမ်းအင် ရစေသလို သံဓာတ်ဟာလည်း ခန္ဓာကိုယ် တစ်သျှူးတွေ အောက်ဆီဂျင်ရရှိဖို့အတွက် အရေးပါ ပါတယ်။ လစဉ် ရာသီသွေး ဆင်းနေတဲ့ အမျိုးသမီးတွေမှာ သံဓာတ် ချို့တဲ့ နေတတ်ပါတယ်။ အိပ်ရေး ပျက်တာကလည်း စွမ်းအင် ကျစေသလို အာရုံစူးစိုက်မှုကို လျော့ကျ စေပါတယ်။ အိပ်ချိန်နည်းတာက စိတ်ဖိစီးမှုများစေတဲ့ အချက်တစ်ချက် ဖြစ်သလို စိတ်ဖိစီးမှု များတာကြောင့်လည်း အိပ်ရေးပျက်တတ်ပါတယ်။
စိတ်ဖိစီးမှု ထိန်းချုပ်ခြင်း
စိတ်ဖိစီးမှုက လူတိုင်းအပေါ် သက်ရောက်မှုရှိပေမယ့် တစ်ဦးနဲ့တစ်ဦး တုံ့ပြန်မှု ချင်းတော့ မတူပါဘူး။ ဖိအားများတဲ့ အခြေအနေမှာ အာဟာရကို များများ မှီဝဲ ပေးသင့်ပါတယ်။ အထူးသဖြင့် ဗီတာမင်ဘီ အုပ်စုပါတဲ့ အစာတွေကို စားပေးရင် စိတ်ဖိစီးမှု ဖြစ်စေတဲ့ ဟော်မုန်း ထွက်တာကို လျော့ကျစေပါတယ်။ စိတ်ဖိစီးမှုကို မထိန်းချုပ်နိုင်ရင် ကြွက်သားတွေ ကိုက်ခဲနာကျင်တာ၊ စိတ်က သိကအောက် ဖြစ်တာနဲ့ သွေးတိုးတွေကို ဖြစ်စေနိုင်ပါတယ်။ စိတ်ဖိစီးမှုကို အရက်နဲ့တော့ မဖြေရှင်းပါနဲ့။ လူအများစုက စိတ်ဖိစီးမှုကို အရက်နဲ့ ဖြေရှင်း တတ်ပြီး ၃၅ ရာခိုင်နှုန်းက အရက်ကြောင့် အန္တရာယ် ဖြစ်တတ်ပါတယ်။
အရိုးများ
အရိုး သိပ်သည်းဆ အကောင်းဆုံး အရွယ်ဖြစ်တဲ့ အသက် ၂၅ နှစ်မှာ နောင် ကာလ တစ်လျှောက်လုံး သန်စွမ်းမှုရှိစေဖို့ ပုံမှန်လေ့ကျင့်ခန်း လုပ်ပေးရ ပါမယ်။ ပြေးတာ၊ လမ်းလျှောက်တာ၊ ယောဂကျင့်တာ၊ ထိုက်ချိ ကစားတာလို လေ့ကျင့်ခန်းတွေက အရိုးပါးရောဂါ ဖြစ်နိုင်တဲ့ အန္တရာယ်ကို လျော့ကျ စေပါ တယ်။ အသက် ၂၅ နှစ် ကျော်ချိန်မှာ အမျိုးသမီးတွေ အားလုံးကို ကယ်လ်စီယမ်နဲ့ ဗီတာမင် D3 မှီဝဲဖို့ ဆရာဝန်တွေက ညွှန်ကြား တတ်ပါတယ်။
အသားအရေ
အသက် ၂၀ အရွယ်မှာတော့ အသားအရေက သိသိသာသာ ထိခိုက်ပျက်စီးမှု မရှိသေးပါဘူး။ နေရောင်ခြည်ဒဏ်ကို အလွန်အမင်း ခံရရင်တော့ (နေရောင် ကာ ခရင်မ်ကို မလိမ်းရင်၊ နေကာမျက်မှန် မတပ်ရင်) အသားအရေက အရွယ်မတိုင်ခင် ထိခိုက်ပျက်စီးမှု ဖြစ်နိုင်ပါတယ်။ အကောင်းဆုံး ကာကွယ်မှု ကတော့ နံနက် ၁၀ နာရီနဲ့ ညနေ ၄ နာရီအချိန်အတွင်းမှာ အပြင်မထွက်ဖို့ပဲ ဖြစ်ပါတယ်။ ဗီတာမင်အီးကလည်း နေလောင်ဒဏ်ကြောင့်ဖြစ်တဲ့ အရေပြား နီမြန်းမှုကို လျော့ကျ စေပါတယ်။ အင်တီ အောက်ဆီးဒင့် တွေဖြစ်တဲ့ ကိုအင်ဇိုင်းကျူ ၁၀၊ ဗီတာမင် အေ၊ စီ၊ အီး၊ ဆီလီနီယမ်နဲ့ စပျစ်စေ့တွေ ဟာလည်း ခရမ်းလွန်ရောင်ခြည်နဲ့ ပတ်ဝန်းကျင် ညစ်ညမ်းမှုကြောင့် အရေပြား ထိခိုက်မှုကို ကာကွယ် ပေးနိုင်ပါတယ်။
လေ့ကျင့်ခန်းလုပ်ခြင်း
အလုပ်များ နေတာကြောင့် ကိုယ်ခန္ဓာ ကြံ့ခိုင် ဖွံ့ဖြိုးအောင် စနစ်တကျ လေ့ကျင့်ခန်း မလုပ် ဖြစ်ရင်တောင် လမ်းလျှောက်ပေးပါ။ ပုံမှန် လမ်းလျှောက် ပေးတာက ကိုယ်နဲ့ စိတ်ကို ကျန်းမာ စေပါတယ်။ ဒါ့အပြင် အရိုးသိပ်သည်း ဆကို ကောင်းစေတာ၊ နှလုံး သွေးကြောစနစ် ကျန်းမာစေတာ၊ ကိုယ်အလေး ချိန် ထိန်းနိုင်တာ၊ အိပ်ရေးဝဝ အိပ်ပျော်တာနဲ့ ပူပင်သောကကို လျှော့ချနိုင် တာစတဲ့ အကျိုးကျေးဇူးတွေကို ရရှိစေပါတယ်။
ဇွန်ခိုင်ဦး (ဆေးဝါးတက္ကသိုလ်)
မြ၀တီ
