ထိုအရွယ်တွင် မိသားစု အတွင်း၌ လည်းကောင်း၊ နေ့စဉ် ထိတွေ့ဆက်ဆံရသည့် ပတ်ဝန်းကျင်၌ လည်းကောင်း ဆေးလိပ်သောက်သူများ ရှိပါက ဆေးလိပ် သောက်ဖြစ်မည်မှာ သေချာသလောက် ဖြစ်သည်။ မြန်မာလူမျိုးများ ဆေးလိပ် သောက်သုံးသည့် ဓလေ့ မည်သည့်ကာလတွင် စတင်ခဲ့သည်ကို မသိရသော်လည်း ရှေးဘုရင်ခေတ်များကပင် ဆေးလိပ် သောက်သုံးမှု ရှိခဲ့ကြောင်း ရုပ်ပုံကားချပ်များ၌ တွေ့မြင်ရ သည်။ ရှေးက ဆေးလိပ်သောက်သုံး သူများသည် မိမိနေအိမ်တွင် လက်ဖြစ် ဆေးလိပ်များ ပြုလုပ်၍ သောက်သုံးခဲ့သလို ဤဓလေ့ကို ယခုတိုင် ကျေးလက် တောနယ် အချို့တွင် တွေ့မြင်ရလျက် ရှိသည်။
မြန်မာလူမျိုးတို့ သောက်သုံးသည့် ဆေးလိပ်တွင် ဆေးပေါ့လိပ်၊ ဆေးပြင်းလိပ်၊ ဆေးတံ၊ စီးကရက်၊ ပွတ်ချွန်း၊ ဝါးပြောင်းဖြင့် ရှူခြင်းများ ပါရှိလေသည်။ ထို့အပြင် ဆေးရွက်ကြီး သို့မဟုတ် ဆေးပြင်းလိပ်ကို ကိုက်ဖဲ့၍ ငုံသည့်ဓလေ့ကိုလည်း တွေ့ရသည်။ ဆေးလိပ်သောက်သည် ဖြစ်စေ၊ ဆေးရွက်ကြီး ငုံသည်ဖြစ်စေ ဆိုးကျိုးခြင်း အတူတူဖြစ်သည်။ ကမ္ဘာ့လူဦးရေ တစ်ဘီလီယံခန့် ဆေးလိပ်သောက်သုံးလျက် ရှိပြီး အမျိုးသမီး သန်း ၂ဝဝ အပါအဝင် ဖြစ်ကြောင်း သိရသည်။
ပွတ်ချွန်းသောက်ခြင်းသည် အိမ်နီးချင်း နိုင်ငံတစ်ခုမှ ကူးစက်လာသည့် ဓလေ့တစ်ခု ဖြစ်သည်။ အနေတော် ဖြတ်ထားသည့် သတင်းစာ စာရွက် သို့မဟုတ် စက္ကူရွက် အတွင်းသို့ ဆေးမှုန့်ထည့်ကာ လက်ဖြင့် ကတော့ ပုံသဏ္ဌာန် လိပ်ထားသည့် ဆေးလိပ်ဖြစ်သည်။ စက္ကူရွက် အစား ဖက်ကို အသုံးပြုသည်ကိုလည်း တွေ့နိုင်ပြီး ၎င်းဖက်လိပ်ပွတ်ချွန်းကို (ဘီဒီ)ဟု ခေါ်ကြောင်း သိရသည်။
စက္ကူပွတ်ချွန်းကိုကျေးလက်တောနယ်၊ အစွန်အဖျား ဒေသများတွင် အသုံးများပြီး ဘီဒီပွတ်ချွန်းကို မြို့ကြီးများတွင် ဝယ်ယူရရှိနိုင်သည်။ ပွတ်ချွန်းဟူသည် တစ်နည်းအားဖြင့် လက်ဖြစ် စီးကရက် တစ်မျိုးဖြစ်ပြီး အခြားဆေးလိပ်များထက် ပိုမို အန္တရာယ် ရှိသည်မှာ ရှူရှိုက်စဉ် ဆေးမှုန့်များ လည်ချောင်းတွင်း ကပ်ငြိ၍ ချောင်းဆိုးသွေးပါခြင်း ဖြစ်သည်။ ဝါးပြောင်းရှူခြင်းသည်လည်း ပွတ်ချွန်းကဲ့သို့ အိမ်နီးချင်း နိုင်ငံတစ်ခုမှ ကူးစက်ခဲ့ပြီး ကချင်ပြည်နယ်နှင့် ရှမ်းပြည်နယ်တို့တွင် အသုံးများသည်။ အချင်း သုံးလက်မခန့်၊ အရှည် နှစ်ပေခန့်ရှိ တစ်ဖက်ပိတ် အဆစ်ဖောက် ဝါးပြောင်းကို ခါးလယ်မှ လက်တံထုတ်၍ ၎င်းလက်တံထိပ်တွင် မီးညှိထားသည့် စီးကရက်ထောင်ကာ ဝါးပြောင်း၏ ဖွင့်ထားသည့်ဘက်မှ ပါးစပ်ဖြင့် စုပ်ရှူခြင်း ဖြစ်သည်။
ဝါးပြောင်းအတွင်း ရေတစ်ဝက်ခန့် ရှိပြီး ၎င်းရေကို ဖြတ်ကာ စီးကရက် မီးခိုးများ ပါးစပ်အတွင်းသို့ ရောက်လေသည်။ ပါးစပ်ဖြင့် ရှူ၍ နှာခေါင်းဖြင့် ထုတ်ခြင်း ဖြစ်ပြီး စီးကရက်မီးခိုးများ ရေတွင် ဖြတ်သန်းခဲ့သည် ဖြစ်၍ နီကိုတင်းခေါ် အဆိပ်ငွေ့များ ရေတွင် ကျန်ရှိသဖြင့် အဆုတ် ထိခိုက်မှု နည်းကြောင်း ရှူရှိုက်သူများက အကြောင်းပြကြလေသည်။ ဝါးပြောင်းရှူခြင်းသည်လည်း ဆေးလိပ်သောက်ခြင်း တစ်မျိုးသာ ဖြစ်၍ ဆိုးကျိုးခြင်း မကွာခြားပါပေ။
မှတ်တမ်းတစ်ခုအရ တရုတ်နိုင်ငံတွင် လူသုံးဦးလျှင် တစ်ဦး ဆေးလိပ်သောက်ကြောင်း သိရသဖြင့် တရုတ်နိုင်ငံသား သုံးပုံတစ်ပုံ ဆေးလိပ်သောက်လျက် ရှိသည်။
တစ်နည်းအားဖြင့် တရုတ်နိုင်ငံ လူဦးရေ၏ သုံးပုံတစ်ပုံ ဖြစ်သည့် သန်းပေါင်း ၄၅ဝ ခန့် ဆေးလိပ်သောက်သုံးလျက် ရှိကြပေရာ မြန်မာနိုင်ငံ လူဦးရေ၏ ခုနစ်ဆကျော် ဆေးလိပ် သောက်သုံးလျက် ရှိသည်။ ထိုကဲ့သို့ ဆေးလိပ် သောက်သုံးသူများတွင် အမျိုးသမီးများနှင့် ကလေးများလည်း ပါမည်ဖြစ်သည်။ ဆေးလိပ်သောက်သည့် မိဘများ၊ ဆေးလိပ်သောက်သည့် ပတ်ဝန်းကျင်တွင် ကြီးပြင်းရသည့် ကလေးများသည် အတုမြင် အတတ်သင်ကြမည်သာဖြစ်သည်။
ဆေးလိပ်သောက်သည့် ကလေးကို ဆေးလိပ်သောက်သည့် မိဘက ထိရောက်စွာ တားမြစ်မည် မဟုတ်သလို ဆေးလိပ်မကောင်းကြောင်း ပညာပေးမည်လည်း မဟုတ်ပေ။ ဆေးလိပ်သောက်သူများ အကြား ကြီးပြင်းရသည့် ကလေးငယ်သည် မီးခြစ် ရှာခိုင်းခြင်း၊ မီးညှိခိုင်းခြင်းမှ အစပြု၍ ကိုယ်တိုင်စမ်းသပ် ကြည့်လိုမှု အဆုံးတွင် ဆေးလိပ်သောက်သူ ဖြစ်ပေတော့သည်။ ထို့ကြောင့် မိဘများ အနေဖြင့် ဆေးလိပ်သောက်သုံးခြင်းသည် ကျန်းမာရေးကို ဆိုးရွားစွာ ထိခိုက်စေနိုင်ကြောင်း သိထားခဲ့ပါလျှင် မိမိကိုယ်၌ သာမက သားသမီးများကိုပါ အမွေဆိုးများ မပေးမိစေရန် သတိပြုသင့်ပေသည်။ လက်ဦးဆရာ မည်ထိုက်စွာ၊ ပုဗ္ဗာစရိယ၊ မိနှင့်ဖဟူသကဲ့သို့ပင်။
စာသင်ကျောင်း အချို့၌ ဆေးလိပ် ကင်းစင်ကျောင်း၊ ဆေးလိပ်ကင်းစင်နယ်မြေ ဟူသည့် စာသားအချို့ တွေ့ရသည်။ တစ်လောက TV တွေ့ဆုံခန်း တစ်ခုတွင် ကျောင်းမျက်နှာစာ ကိုက် ၁ဝဝ အတွင်း ဆေးလိပ် မရောင်းရန် အမိန့်ထုတ်ထားကြောင်း ကြားရသည်။
ကျောင်းသားအရွယ်သည် အတုမြင်အတတ်သင်ကာ လက်တည့်စမ်း လိုကြသည့် အရွယ်ဖြစ်သည်။
ဆေးလိပ်သောက်သုံးမှု အခြေခံ ရှိသွားပါက ငယ်စဉ်မှစ၍ ဆေးလိပ် သောက်သူများ ဖြစ်ပေရော့မည်။
လူတို့၏စိတ်သည် မကောင်းမှု၌ မွေ့လျော်တတ်ပေရာ တစ်ဦးမှစ၍ အခြား သူငယ်ချင်းများလည်း ပါလာပေမည်။ ဦးနှောက်ကြည်လင် သန့်ရှင်းစွာဖြင့် ဉာဏ်ရည် တက်နေချိန်တွင် ဆေးလိပ်မှိုင်းများ စွဲသွားပါက သင်ကြားသည့် ပညာကို ဖတ်ရန်၊ မှတ်ရန် အားနည်းပေမည်။
မူလဉာဏ်ရည်မြင့်သော သူများ ဖြစ်လင့်ကစား ဆေးလိပ်၏ ဘေးထွက်ဆိုးကျိုးများကြောင့် ဉာဏ်ရည်အဆင့် နိမ့်ကျကာ ရောဂါများလည်း စွဲကပ်လာမည်သာ ဖြစ်သည်။
တကယ်တမ်း ဆန်းစစ်လျှင် ဆေးလိပ်ဟူသည် မူးယစ်ဆေးဝါး တစ်မျိုးသာဖြစ်သည်။ ဆေးလိပ်တွင် ပါရှိသည့် နီကိုတင်းဓာတ်သည် ဘိန်းကဲ့သို့ လေးလံ ထိုင်းမှိုင်းပြီး စွဲလမ်းမှုကို ဖြစ်စေသည်။ ထို့ကြောင့် မသိမသာ သောက်သုံးရာမှ သိသိသာသာ စွဲလမ်းသည့် အဖြစ်သို့ ရောက်ခဲ့ သည်။ ဆေးလိပ် သောက် သုံးမှုကြောင့် အဆုတ်ထိခိုက်၍ အမောမခံနိုင်ခြင်း၊ တီဘီရောဂါ ဖြစ်ပွားခြင်း၊ ကင်ဆာရောဂါ ဖြစ်ပွားခြင်းများ မှ အရွယ်ငယ်ငယ်ဖြင့် အသက် သေဆုံး ရပေမည်။
အထူးသဖြင့် သန့်ရှင်းမှု မရှိသော၊ စနစ်တကျ ထုတ်လုပ်ထားခြင်း မရှိသော ဆေးလိပ်များကို သောက်သုံးခြင်းဖြင့် နဂိုမူလ မရှိခဲ့သည့် ရောဂါ အသစ်များ ကို မိမိကိုယ်တိုင် ဖိတ်ခေါ်သကဲ့သို့သာ ဖြစ်သည်။
ထို့ကြောင့် နိုင်ငံတော်၏ အခြေခံ လူသား အရင်းအမြစ်များ ဖြစ်သည့် ကျောင်းသားထုအတွင်း ဆေးလိပ် သောက်သုံးခြင်း ဓလေ့ စွဲကပ်ခြင်း မရှိရလေအောင် ပညာပေးခြင်း နည်းလမ်းသာမက အုပ်ချုပ်မှုကြောင်း အရပါ နည်းလမ်း ရှာဖွေသင့်သည်။
မြန်မာနိုင်ငံတွင်သာမက ကမ္ဘာ့နိုင်ငံ အသီးသီး၌ပါ လူစည်ကားရာ အရပ်များ၊ ဌာနဆိုင်ရာများ၌ ဆေးလိပ်သောက်ရန် ဧရိယာ သတ်မှတ်ပေးမှုများရှိကြောင်း တွေ့ရသည်။ ဆေးလိပ်သည် ကိုယ်တိုင် သောက်သုံးသူအတွက် သာမက တစ်ဆင့်ခံ ရှူရှိုက်မိသူအတွက်လည်း ဆတူဆိုးကျိုးကို ခံစားရမည်သာဖြစ်သည်။ဆေးလိပ်သောက်ခြင်းကို ဆန့်ကျင်နိုင်ရန် လှုပ်ရှားမှု အဖြစ် အားကစား ပြိုင်ပွဲ ပြုလုပ်မှုများ ပိုမိုများပြားလာကြောင်း တွေ့ရသည်။ အားကစား ပြိုင်ပွဲများ၏ ရည်မှန်းချက်မှာ ကျန်းမာကြံ့ခိုင်သည့် နိုင်ငံသားများ ပေါ်ထွက်လာရေး၊ ကျန်းမာသော လူနေမှုပုံစံဖြင့် ကြံ့ခိုင် သန်စွမ်းအောင် လေ့ကျင့်ပေးရေး ဖြစ်သည်။ အားကစားသမား ဟူသည် သက်လုံကောင်းရန် လိုသည်။ သက်လုံကောင်းရန် အတွက် အဆုတ်အား ကောင်းရမည်၊ အဆုတ်အား ကောင်းရန် အတွက် အဆုတ်ကို အန္တရာယ်ပေးမည့် ဆေးလိပ်နှင့် ကင်းမှဖြစ်ပေမည်။ ကျန်းမာမှ အလုပ်လုပ်နိုင် မည်ဖြစ်သလို ကျန်းမာမှ စိတ်သွားတိုင်း ကိုယ်ပါပေမည်။
၂ဝ၁၄ ခုနှစ် ပြည်ထောင်စု၏ အခွန်အကောက် ဥပဒေပြဋ္ဌာန်းချက် အရ ဧပြီ ၁ ရက်မှစ၍ စီးကရက် အခွန်ကို ၁ဝဝ ရာခိုင်နှုန်း ဆေးရွက်ကြီး၊ ပေါင်းတင်ပြီး ဗာဂျီးနီးယားဆေး၊ ဆေးပြင်းလိပ်၊ ဆေးပေါ့လိပ်၊ဆေးတံတို့ကို ၅ဝ ရာခိုင်နှုန်း အခွန်စည်းကြပ်တော့မည် ဖြစ်ကြောင်း သိရသည်။ ဆေးလိပ်အခွန် စည်းကြပ်လျှင် ဆေးလိပ်ဈေးနှုန်း များလည်း မြင့်တက်လာမည် ဖြစ်သည်။ ဆေးလိပ် တန်ဖိုး ကြီးမြင့်ချိန်တွင် ဆေးလိပ် မဖြတ်နိုင်မှုကြောင့် ဈေးပေါပေါနှင့် ရနိုင်သည့်ဆေးလိပ် များကို သောက်သုံးရာမှ ကျန်းမာရေး ပြဿနာများ ပိုလာမည်မှာ ဆန့်ကျင်ဘက်တို့ ဒွန်တွဲနေသည့် သဘောတရားများပင် ဖြစ်သည်။ ဆေးလိပ် အခွန်မြှင့်တင်ခြင်းနှင့် အတူ ဆေးရိုး၊ ဆေးရွက် စသည့် ဆေးလိပ် ကုန်ကြမ်းများဖြင့် အသက်မွေးဝမ်းကျောင်း ပြုကြသည့် တောင်သူများ၊ ဆေးလိပ်ခုံ လုပ်သားများအတွက် အစားထိုး လုပ်ငန်းများကို ဟန်ချက်ညီ ဖန်တီးပေးရမည်ဖြစ်သည်။
တစ်ဖက်တွင် ဆေးလိပ်၏ ဆိုးကျိုးများ ဆိုင်ရာ ဟောပြောပွဲများ၊ စကားရည်လုပွဲများ၊ ပညာပေးဇာတ်လမ်းတိုများ၊ အကြီးအကဲများ ကိုယ်တိုင် ပါဝင်ဆွေးနွေးသည့် အင်တာဗျူး၊ သတင်းစာ၊ ဂျာနယ်များ၏ ခေါင်းစီးတွင် ဆေးလိပ်အန္တရာယ် ဖော်ပြသည့် ပညာပေး စာတန်းများကို ပိုမိုထိရောက်စွာ ဆောင်ရွက်ခြင်း၊ ဆေးလိပ်နှင့် စီးကရက်ကြော်ငြာများ လုံးဝ ခွင့်မပြုခြင်း၊ ဆေးလိပ်သောက်သုံး ရန် နေရာ၊ ဆေးလိပ် သောက်သုံးခွင့်ပြု သည့် အသက်အရွယ်များ ပါရှိသည့် တစ်ဦးချင်း ဆေးလိပ် သောက်သုံးခွင့် လိုင်စင်များ ထုတ်ပေး၍ စစ်ဆေးခြင်း ကိုလည်း ကြပ်ကြပ် မတ်မတ် ဆောင်ရွက်သွားသင့်သည်။
ဆေးလိပ်ဖြတ်ကြသည့် နည်းအမျိုးမျိုး ရှိသည်။ တချို့က ဆေးလိပ် အစားထိုး အဖြစ် ကွမ်းစားခြင်း၊ ပီကေဝါးခြင်းတို့ကို ပြောင်းလဲပြုလုပ်သည်။ အနောက်နိုင်ငံများတွင် လျှပ်စစ်ဆေးလိပ်ဟု ခေါ်သည့် ဆေးလိပ်အတုကိုအာသာပြေ ရှိုက်ဖွာကြောင်း တွေ့ရပြီး ရောင်း အားကောင်းစေရန် ကြော်ငြာများ ထည့်သွင်း ဖော်ပြကြသည်။
မကြာသေးမီ ကြားသိရသည့် သတင်းတစ်ပုဒ်အရ ဆေးလိပ် အစားထိုး E- စီးကရက် အရောင်းဆိုင်အား မြရိပ်ညို ဟိုတယ်ဝင်းတွင် ရုပ်ရှင် သရုပ်ဆောင် တစ်ဦးက ဖွင့်လှစ်ခဲ့ကြောင်း သိရသည်။ E- စီးကရက် သောက်သုံးခြင်းအား အင်္ဂလိပ်ဘာသာဖြင့် Vaping ဟုခေါ်ကြောင်း သိရသည်။ မိမိစိတ်က ပြတ်လျှင် ပြတ်မည်သာဖြစ်သည်။မိမိစိတ်ကို မနိုင်လျှင် ဘာနှင့်ဖြတ်ဖြတ် ပြတ်မည် မဟုတ်ပေ။ ပတ်ဝန်းကျင်ကြောင့်၊ လူမှုရေးအရ၊ တစ်ခါတစ်ရံ ချင်ခြင်းတက်ခြင်း ဆိုသည်များသည် ဆင်ခြေများ ဖြစ်သည်။
သို့ဖြစ်ပါ၍ ဆေးလိပ် အမှန်တကယ် ဖြတ်လိုပါလျှင် ဆုံးဖြတ်ချက်ကို ခိုင်မာအောင် ချမှတ်ပြီး မိမိစိတ်ကို နိုင်အောင် ထိန်းရန်ဖြစ်သည်။ လျှော့သောက်ခြင်း၊ မျှဉ်း၍ ဖြတ်ခြင်းများသည် မိမိစိတ်ကို မနိုင်သေးကြောင်း ဖော်ပြလျက်ရှိသည်။ မိမိစိတ်ကို မနိုင်သူသည် တိုးတက်နိုင်ပါမည်လား၊ ကြီးမြင့်နိုင်ပါမည်လား ဆိုသည်မှာ အထူးပြောစရာ လိုမည် မထင်ပေ။ မျက်မှောက်ကာလတွင် ဖြစ်စေ၊
အနာဂတ် ကာလအတွက် ဖြစ်စေ ဦးဆောင်ဦးရွက် ပြုလိုသူများသည် ဆေးလိပ်၏ ဆိုးကျိုးများကို ဆင်ခြင်သုံးသပ်ကာ လူ့ပတ်ဝန်းကျင်နှင့် သဟဇာတ မဖြစ်တော့သည့် ဆေးလိပ်သောက်ခြင်း ဓလေ့ကို အမြန်ဆုံး ပယ်သတ်သင့်ပါကြောင်း ရေးသား လိုက်ရပါသည်။ ။
မြ၀တီ
https://www.facebook.com/mwdmedia?fref=nf
