အပ်တွန်ပတ်ခ်တွင် အနိုင်သုံးမှတ် ရယူနိုင်ခဲ့သည့် မန်ချက်စတာယူနိုက်တက်

ပရီးမီးယားလိဂ် ပွဲစဉ် (၃၁) ဝက်စ်ဟမ်းနှင့် မန်ချက်စတာယူနိုက်တက် ပွဲစဉ်တွင် ဧည့်သည် ယူနိုက်တက်က ၂-၀ ဂိုးဖြင့် အနိုင်ရရှိခဲ့သည်။

ဝက်စ်ဟမ်းတွင် အေဒရီယန်၊ မက္ကာနေ၊ နိုလန်၊ တွမ်ကင်စ်၊ ကာရိုးလ်၊ တေလာ၊ နိုဘယ်လ်၊ ကောလင်းစ်၊ ဒီမယ်လ်၊ ဒိုင်ယာမီ၊ ဒေါင်းနင်းတို့ ပွဲထွက်ပါဝင်ခဲ့သည်။

မန်ချက်စတာယူနိုက်တက်တွင် ဒီဂီယာ၊ ရာဖေးလ်၊ ဂျုံးစ်၊ ကာရစ်၊ ဘတ်နာ၊ မာတာ၊ ဖလက်ချာ၊ ဖယ်လိုင်နီ၊ ယန်း၊ ကာဂါဝါ၊ ရွန်နီတို့ ပါဝင်ကစားခဲ့သည်။

ယခုပွဲစဉ်တွင် မန်ချက်စတာယူနိုက်တက်သည် ချန်ပီယံလိဂ် လူစာရင်း ၆ နေရာကို အပြောင်းအလဲ ပြုလုပ်ပြီး ဝက်စ်ဟမ်းကို ယှဉ်ပြိုင်ခဲ့သည်။ ၄ မိနစ်တွင် ဖယ်လိုင်နီ၏ ဂိုးသွင်းရန် ကြိုးပမ်းမှုကို အင်ဒီကာရိုးလ် ကာကွယ်ရှင်းထုတ်နိုင်ခဲ့သည်။ ၆ မိနစ်တွင် ကာဂါဝါ ပေးပို့သည့် ဘောလုံးကို မာတာ ကန်သွင်းရာ အားပျော့သွားခဲ့သောကြောင့် ဝက်စ်ဟမ်း ဂိုးသမား ကာကွယ်သွားနိုင်ခဲ့သည်။ ၈ မိနစ်တွင် မန်ချက်စတာယူနိုက်တက်က အဖွင့်ဂိုး ရရှိသွားခဲ့သည်။ အဆိုပါဂိုးကို အင်္ဂလန် တိုက်စစ်မှူး ဝိန်းရွန်နီက ကိုက် ၅၀ အကွာမှ လှလှပပ ကန်သွင်းယူခဲ့သည်။ ၂၅ မိနစ်တွင် မာတာ၏ ပေးပို့မှုမှတစ်ဆင့် ကာဂါဝါ ဘယ်ခြေဖြင့် ကန်သွင်းရာ ဂိုးသမား အေဒရီယန် ကာကွယ်နိုင်ခဲ့သည်။ ၃၀ မိနစ်တွင် မာတာက နောက်ထပ် တစ်ကြိမ် အခွင့်အရေး ရရှိခဲ့သော်လည်း ၎င်း၏ ကန်သွင်းချက်ကို အေဒရီယန်ကပင် ကာကွယ်သွားခဲ့သည်။ ၃၄ မိနစ်တွင် ယူနိုက်တက်က ဒုတိယ ဦးဆောင်ဂိုး ရရှိသွားခဲ့ပြီး အဆိုပါ ဂိုးကို ဝိန်းရွန်နီက သွင်းယူခဲ့သည်။

ဒုတိယပိုင်းတွင် ဝက်စ်ဟမ်းက ချေပဂိုးများ ရရှိရန်အတွက် ယူနိုက်တက် အသင်းဘက်သို့ အမြင့်ဘောများဖြင့် တိုက်စစ်ဆင် ခြိမ်းခြောက်မှုများ ပြုလုပ်ခဲ့သည်။ သို့သော်လည်း ကာရစ်၊ ဖယ်လိုင်နီ၊ ဂျုံးစ်တို့က ကာရိုးလ်၊ နိုလန်နှင့် ဒိုင်ယာမီတို့၏ အမြင့်ဘော ခြိမ်းခြောက်မှုများကို အကောင်းဆုံး ကာကွယ် ရှင်းထုတ်နိုင်ခဲ့သည်။ ထို့အပြင် ယူနိုက်တက်ကလည်း ဂိုးထပ်မံ သွင်းယူနိုင်ခဲ့ခြင်း မရှိသောကြောင့် ပွဲအပြီးတွင် ဝိန်းရွန်နီ၏ ပထမပိုင်း သွင်းဂိုးများဖြင့် မန်ချက်စတာယူနိုက်တက်က အနိုင်သုံးမှတ် ရရှိသွားခဲ့သည်။

Soccer Myanmar