မေးတာတာ ၄-၅ ယောက်ရှိပြီ။ မီဒီယာမှာတင်ထားတဲ့ လင့်ပို့ပေးသူလည်းပါတယ်။ ဆွေမျိုးတွေဆီကသွေးသွင်းရင် သေတတ်တယ်လို့လည်းပါတယ်။ ခပ်တိုတို ဖြေခဲ့ပါတယ်။ အစိုးရိမ်မကြီးသင့်ပါ။ အခု နည်းနည်း ရေးပါရစေ။
ဒီစာရေးဘို့ အရင်ဆုံးသုတေသနလုပ်ပါတယ်။ Blood transfused from relatives can be fatal - TA GVHD သေနိုင်တယ်လို့ အိန္ဒိယဆရာဝန်တယောက်ရေးတာလည်းဖတ်ရတယ်။ အဲတာတခုသာ တွေ့သေးတယ်။ ၃-၁ဝ-၂ဝ၁၂ နေ့က ဆွေမျိုးရင်းဆီကနေသွေးရယူတဲ့လူနာတယောက် သေဆုံးတာရှိတယ်။ TA-GVHD ကြောင့်ဖြစ်တယ်။ Transfusion-associated graft-versus-host disease လို့ခေါ်တယ်။
ဆွေမျိုးတယောက်ဆီက ယူတဲ့သွေးဟာ အမည်မသိသူတယောက်ဆီကသွေးလောက် စိတ်မချရဘူးလို့ဆိုပါတယ်။ GVHD ခေါ်တဲ့ အလှူရှင်-လက်ခံသူကြားဖြစ်တတ်တဲ့ရောဂါကို သတိထားဘို့ရှိပါတယ်။ အဲလိုဖြစ်ရင် အလှူရှင့် သွေးဖြူဥတွေက လက်ခံသူရဲ့သွေးဥတွေကို တိုက်ခိုက်မယ်။ သေဆုံးတဲ့အထိ ဖြစ်နိုင်တယ်။ အဲလိုမဖြစ်အောင် ကာကွယ်လို့ရပါတယ်။ လှူတဲ့သွေးဖြူဥတွေကို အဲလိုမလုပ်စေအောင်နည်းရှိတယ်။ Blood irradiation လို့ခေါ်တယ်။
သွေးတိုက်ရိုက်ဖေါက်ယူသွင်းပေးနည်းဆိုတာရှိတယ်။ ဆွေမျိုးဆီကရော သူငယ်ချင်းဆီကနေပါ သွေးဖေါက်ယူပြီး လူနာကို သွေးသွင်းပေးနည်းဖြစ်တယ်။ ခွဲစိတ်လူနာကို လုပ်ရလေ့ရှိတယ်။ ဆေးသုတေသနစာတမ်းရဲ့ အကြံပြုချက်ကတော့ ဆွေမျိုးအရင်းဆီကနေ သွေးမလှူသင့်။ မဖြစ်မနေလှူရရင် Blood irradiation နည်းနဲ့ကာကွယ်ပါ။
အခြေခံအချက်ကတော့ ABO သွေးအုပ်စုတူမယ်၊ Rh အုပ်စုလည်းတူမယ်၊ သွေးထဲမှာ ကူးစက်ရောဂါပိုးလည်းမရှိရင် သွေးလှူနိုင်တယ်။
သွေးလှူရှင်တဦးမှာ ရှိရမယ့် အရည်အချင်းတွေ
• အသက် အနည်းဆုံး (၁၇) နှစ်ရှိရမယ်။
• ကိုယ်အလေးချန် အနည်းဆုံး 110lbs ပေါင်ရှိရမယ်။
• အနည်းဆုံးသွေးထုထည် 10 mls/kg လှူနိုင်တယ်။
• အနည်းဆုံး ဟီမိုဂလိုဘင် HGB 12.5 g/dL ရှိရမယ်။
• ကိုယ်ပူမနေရ၊ အအေးမိ၊ တုပ်ကွေး၊ လည်ချောင်းနာ၊ ပိုးတခုခုဝင်နေတာ မရှိစေရ။
• ပဋိဇီဝဆေးသောက်ထားသူ ဆေးသောက်ပြီးနောက် အနည်းဆုံး ၄၈ နာရီကွာခြားရမယ်။
• သွေးရယူသူဟာ သားသမီးရနိုင်တဲ့အရွယ်ရှိသူ လူနာအမျိုးသမီးဖြစ်ရင် သူ့ရဲ့ ခင်ပွန်း၊ ဘွိုင်းဖရင်း မဖြစ်စေရ။
ကိုယ်အင်္ဂါအစိတ်အပိုင်းလှူတာတွေကို သတိထားကြည့်ပါ။ ဥပမာ အသည်းအစားထိုးခြင်း။ အသည်းလှူသူတွေဟာ ဆွေမျိုးသားချင်းတွေဖြစ်တတ်တယ်။ အလှူခံသူနဲ့ လှူသူကို အမျိုးမျိုးစစ်ဆေးတယ်။ သွေးအုပ်စုကို အရင်ဆုံးဖြစ်တယ်။ လက်သင့်ခံနိုင်တဲ့အရည်အချင်းပြည့်နေရင် အသည်းလှူနိုင်တယ်။ လှူတဲ့သူက သားဖြစ်လို့၊ သမီးဖြစ်လို့ မလှူရ မရှိပါ။ မိသားစုဝင်တယောက်ယောက် သို့မဟုတ် လင်မယား သို့မဟုတ် သမီးရည်းစား မည်သူမဆို ကောင်းနေတဲ့ သူ့ရဲ့ အသည်းတခြမ်းကို လှူနိုင်ကြပါတယ်။
ကျန်းမာရေးနဲ့ ဆေးပညာသတင်းတွေကို နိုင်ငံရေးသတင်းတွေလို လူမှုရေးသတင်းတွေလို ဖတ်တဲ့သူတွေကို မျက်လုံးပြူးအောင်တော့ မရေးသင့်ဘူးထင်ပါတယ်။
ဒေါက်တာတင့်ဆွေ
https://www.facebook.com/drtintswe/
