မိမိခံတွင်းကို မိမိကိုယ်တိုင် စစ်ဆေးခြင်းနည်းလမ်းများ
၁။ မိမိခံတွင်းကို မိမိကိုယ်တိုင်စစ်ဆေးရာတွင် မတ်တပ်ရပ်၍ စစ်ဆေးရမည်ဖြစ်သည်။
၂။ အသင့်အတင့်ကြီးပြီး ကြည်လင်သောမှန်ချပ်ကို အလင်းရောင် ရှိသောနေရာတွင် စစ်ဆေးမည့်သူ၏ မျက်နှာ နှင့် တည့်တည့် ချိတ်ဆွဲထားရမည် ဖြစ်ပေသည်။
၃။ ခံတွင်းကို စစ်ဆေးပါကလည်း အလင်းရောင်ဘက်သို့ မျက်နှာလှည့်၍ လုံလောက်သော အလင်းရောင်ဖြင့် စစ်ဆေးရမည်ဖြစ်ပေသည်။
စစ်ဆေးခြင်းများ
စစ်ဆေးမည့်သူသည် အလင်းရောင်ရှိသည့် မှန်ရှေ့၌ ရပ်ကာ မိမိခံတွင်းအတွင်းရှိ အဂါင်္အစိတ်အပိုင်းအားလုံးကို စစ်ဆေးရမည် ဖြစ်ပါသည်။
၁။ ပါးစပ်ဟနိုင်၊ မဟနိုင် စစ်ဆေးခြင်း
မိမိပါးစပ်ပေါက်အား ခါတိုင်းကဲ့သို့ အပြည့်အဝ ဟနိုင်၊ မဟနိုင်၊ မေးရိုးအဆစ်လွဲခြင်း၊ သွားများအံမကျခြင်းများ ယခင်အခါများကဲ့သို့ အစာများ ဝါးနိုင်၊ မဝါးနိုင် စစ်ဆေးရမည်။
၂။ သွားများကို စစ်ဆေးခြင်း
(က) အောက်သွားများကို စစ်ဆေးခြင်း - မိမိ၏ ဘယ်ညာလက်နှစ်ဘက်မှ လက်မနှင့် လက်ညှိုးကို အသုံးပြု၍ အောက်နှုတ်ခမ်းကို ဖြဲပါ။ အောက်မေးရိုးရှိ ရှေ့သွားများ ဘေးသွားများနှင့် အံသွားများကို စစ်ဆေးရမည်။ ယင်းသို့ စစ်ဆေးရာတွင် ရှေ့သွားများ၏ရှေ့ဘက် အပြင်မျက်နှာပြင်၊ အတွင်းမျက်နှာပြင်များ၊ အစားဝါးသည့် အပေါ်မျက်နှာပြင် သွားဖုံးနှင့်ထိစပ်နေသော သွား၏ လည်ပင်းပိုင်း သွားအခြေများတွင် အစာများ တွယ်နေမှုရှိ၊ မရှိ၊ plague ခေါ် သွားချေးများနှင့် ကျောက်များရှိ၊ မရှိ။ သွားပိုးစားပေါက်များ ရှိ၊ မရှိ။ သွားဖုံးများ ရောင်ရမ်းနေခြင်း၊ ရိစားနေခြင်း ရှိ၊ မရှိ။ အမဲစက်များနှင့် အရေးအကြောင်းများ ရှိ၊ မရှိ။ နာကျင်သောနေရာများ ရှိ၊ မရှိ။ ကွဲအက်၍ ပဲ့သော၊ ကျိုးသောသွားများ ရှိ၊ မရှိ စစ်ဆေးရပါမည်။
(ခ) အပေါ်သွားများကို စစ်ဆေးခြင်း
မိမိ၏ အပေါ်သွားများကိုလည်း မိမိ၏ ဘယ်နှင့်ညာ လက်နှစ်ဖက်မှ လက်မနှင့်လက်ညှိုးကို အသုံးပြုကာ အပေါ် နှုတ်ခမ်း ဖြဲမကာ အောက်သွားများ စစ်ဆေးသည့်အတိုင်း စစ်ဆေးရမည်ဖြစ်ပေသည်။
၃။ သွားဖုံးများစစ်ဆေးခြင်း
သွားများ၏ မျက်နှာပြင်အားလုံးကို စစ်ဆေးပြီးပါက သွားများ၏ အခြေရှိ သွားဖုံးကို စစ်ဆေးရမည် ဖြစ်ပေသည်။ သွားဖုံးများ၏ ပင်ကိုမူလအရောင်မှာ ပန်းရောင်ဖျော့ဖျော့ဖြစ်သဖြင့် ရောင်ရမ်းလာပါက နီမြန်းပြီး ထိခိုက်မိသော် သွေးများ ထွက်တတ်ပါသည်။ သို့ပါ၍ သွားဖုံးများ ရောင်ရမ်းမှုရှိ၊ မရှိ။ သွားအခြေတွင် ကျောက်များ အညစ် အကြေးများ ရှိ၊ မရှိ။ ပြည်တည်နေခြင်း ရှိ၊ မရှိကို သွားဖုံးသားတချို့အား ဖိနှိပ်စစ်ဆေးရပါမည်။
၎။ ပါးစောင်များနှုတ်ခမ်းများကို စစ်ဆေးခြင်း
ပါးစောင်များ၊ နှုတ်ခမ်းများကို စစ်ဆေးရာတွင် မိမိ၏ နှုတ်ခမ်းများအား မိမိရရ ကိုင်တွယ်၍ဖြဲကာ ဘယ်ဘက်၊ ညာဘက် ပါးစောင်အတွင်းသားများ၊ နှုတ်ခမ်းအတွင်းသားများကို ရှေ့မှနောက်ထိ ပတ်ပတ်လည် အနာခွက် များနှင့် ပန်းကော်ဖီကဲ့သို့သော အလုံးအကျိတ်များ ရှိ၊ မရှိ စစ်ဆေးရမည် ဖြစ်ပေသည်။
၅။ လျှာကို စစ်ဆေးခြင်း
လျှာကိုစစ်ဆေးရာတွင်လည်း ပါးစပ်ကို ကျယ်ကျယ်ဟ၍ လျှာ၏ အပေါ်မျက်နှာပြင်၊ လျှာကို အပေါ်သို့ဟ၍ လျှာ၏အောက် မျက်နှာပြင်လျှာကို ဘယ်ညာလိမ့်၍ လျှာ၏ ဘယ်ညာဘေးဘက် မျက်နှာပြင်များ၊ လျှာအဖျား၊ လျှာအရင်းများကို ကြည့်ရှုကာ အမှေးပါးများ ရှိ၊ မရှိ။ အဖြူကွက်၊ အနီကွက်နှင့် အလုံးအကျိတ်များ ရှိ၊ မရှိ စစ်ဆေးရမည် ဖြစ်ပါသည်။
၆။ အာခေါင်ကို စစ်ဆေးခြင်း
အာခေါင်ကိုစစ်ဆေးရာတွင်လည်း ပါးစပ်ကို ကျယ်လောင်စွာ ဟ၍ အာခေါင်၏ အရှေ့ပိုင်း( hard palate)နှင့် နောက်ပိုင်း ( soft palate) တို့ကို သေချာစွာ ကြည့်ရှုစစ်ဆေးရပါမည်။ အကွက်များ မာကျောသော အဖုလုံး ကလေးများ ရှိ၊ မရှိ စစ်ဆေးရပါမည်။
အထက်ပါအတိုင်း ခံတွင်းအတွင်းရှိ အင်္ဂါအစိတ်အပိုင်း အားလုံးကို (၃)လလျှင် တစ်ကြိမ်ခန့် ကြည့်ရှု စစ်ဆေး ရမည် ဖြစ်ပါသည်။
မိမိသွားများတွင် သွားပိုးစားရောဂါ လက္ခဏာများဖြစ်သော တွင်းများ၊ ချိုင့်များတွေ့ရှိကသော်လည်းကောင်း၊ သွားဖုံးများရောင်ရမ်းနေပါကလည်းကောင်း၊ အခြားသောအကွက်များ၊ အနာခွက်များ၊ အဖုအကျိတ်များ တွေ့ရှိပါက သွားဆရာဝန်ထံ စောစီးစွာ ပြသကုသခြင်းဖြင့် စောစီးစွာ ကုသမှုရှိ၍ ရောဂါဝေဒနာပြင်းထန်စွာခံစားရခြင်းမျိုးမှ ရှောင်ကြဉ်နိုင်မည် ဖြစ်ပါသည်။
(မှတ်ချက်။ သွားဘက်ဆိုင်ရာဆေးတက္ကသိုလ် ရန်ကုန် နှစ်လည်မဂ္ဂဇင်း ၂၀၀၄မှ ဒေါက်တာ ကျော်ညွန့် ရေးသားသော ဆောင်းပါးအား ကောက်နှုတ်ဖော်ပြပါသည်။)
MOI Webportal Myanmar
https://www.facebook.com/MOIWebportalMyanmar?fref=nf
