ကလေးငယ်တွေမှာ ပန်းနာရင်ကျပ်ထ အရေးပေါ်ဖြစ်တာတွေ ဆောင်းတွင်းနဲ့ မိုးတွင်းမှာ ပိုဖြစ်လေ့ရှိတယ် လို့ ကလေးအထူးကုဆရာဝန်တွေက သတိပေးပြောဆိုကြပါတယ် ။
ပန်းနာရင်ကျပ်ထပြီး အရေးပေါ်ဖြစ်ရခြင်း အကြောင်းရင်းက အအေးမိ နှာစေး ၊ ချောင်းဆိုးပြီး အသက်ရှု လမ်းကြောင်းက လေပြွန်တွေ ယောင်ရမ်းတာ ရုတ်တရက် ပိုဆိုးပြီး ကျဉ်းသွားလို့ အဓိက ဖြစ်ရတာပါ ။ အနံ့မတည့်တာ၊ ဆေးမတည့်တာ၊ အစားအသောက် (အထူးသဖြင့် အသားဓာတ်ဖြစ်တဲ့ အသား၊ ငါး၊ ဥ၊ နို့ စတာတွေ) မတည့်တာ၊ တိရစ္ဆာန် အမွှေးတွေနဲ့ မတည့်တာတွေကြောင့်လဲ ဖြစ်တတ်ပါတယ် ။
ပန်းနာရင်ကျပ်အခံရှိထားတဲ့ ကလေးတွေဟာ အသက်ရှုမဝဘဲ လေသံတရွှီးရွှီးမြည်အောင် အသက်ရှုတတ်ပြီး ချောင်းလဲ သာမန်ထက် ပိုဆိုးတတ်ပါတယ် ။ ဒီလက္ခဏာတွေက ပြေးလွှားလှုပ်ရှားကစားချိန်မှာ ဖြစ်လာတတ်တာပါ။ ဒီကလေးတွေမှာရှိထားတဲ့ ပန်းနာရင်ကျပ်ထလာပြီး အရေးပေါ်ဖြစ်လာရင်တော့ အသက်ရှုပိုမြန်လာတာ၊ အသက်ရှု ဖုတ်လိုက် ဖုတ်လိုက် ဖြစ်လာတာ ၊ ချောင်းပိုဆိုးလာတာ ၊ စကားဆက်တိုက် မပြောနိုင်တော့တာ နဲ့ သွေးခုန်နှုန်းမြန်လာတာတွေ ဖြစ်လာတတ်ပါတယ် ။ သိပ်ဆိုးရင် တခါတရံမှာ သွေးခုန်နှုန်း ပျောက် သွားတတ်ပါတယ် ။
အခုလို အရေးပေါ်အဆင့် မရောက်အောင် ရင်ကျပ်စဖြစ်လာချိန်မှာ Steroid ဟော်မုန်းပါတဲ့ လေပြွန် အယောင်ကျဆေး ရှုဆေးနဲ့ အဓိက ထိန်းထားနိုင်ပါတယ် ။ အခုလို ထိန်းထားခြင်းဖြင့် အအေး မိ နှာစေးချောင်းဆိုးတာနဲ့ မတည့်တာတွေဝင်လာတာကြောင့် ရုတ်တရက် လေပြွန်တွေပိုယောင်အောင် တုံ့ပြန်မှုများလွန်းသွားနိုင်တာကို ကာကွယ်နိုင်လို့ပါ ။ ကလေးငယ်တွေအတွက် စက်နဲ့ရှုတာ(Nebulizer)၊ ကြားခံပစ္စည်းနဲ့ ရှုတာတွေလဲ လုပ်ပေးနိုင်ပါတယ် ။ ဒီရှုဆေးတွေက အသက်ရှုလမ်းကြောင်းထဲ တိုက်ရိုက် အမြန်ရောက်ပြီး အနည်းငယ်သာပေးဖို့လိုတာကြောင့် ထိုးဆေးစားဆေးတွေထက် အခုချိန်မှာ ပိုထိရောက် လာပါတယ် ။ ဒါပေမဲ့ ရှုပုံရှုနည်း မှန်ကန်အောင် သင်ထားပေးဖို့လိုပါတယ် ။ ဒါပေမဲ့ ရင်ကျပ်ထတာ အရေးပေါ်အဆင့်ဖြစ်လာရင်တော့ လေပြွန်ကျယ်စေတဲ့ ရင်ကျပ်ပျောက်ဆေး (Salbutamol) ရှုဆေးအမြန်ပေးပြီး၊ အမြန်ဆုံး ဆေးရုံ၊ ဆေးခန်း ပို့သင့်ပါတယ် ။ တချိန်ထဲမှာ လေပြွန် အယောင်ကျဆေး စားဆေးလဲ တွဲသုံးနိုင်ပါတယ်။
ဒီရောဂါအကြောင်း ပိုမိုသိရှိနိုင်ဖို့ ကိုဝင်းမင်းက ကလေးအထူးကုနဲ့ ဆေးတက္ကသိုလ် (၁) ကလေးကျန်းမာ ၊ပညာဌာန အငြိမ်းစား ဌာနမှူးပါမောက္ခ ဒေါက်တာစောဝင်း ကို ဆက်သွယ်မေးမြန်းတင်ပြထားပါတယ် ။
ကိုဝင်းမင်း/ ဗွီအိုအေ (မြန်မာပိုင်း)
http://burmese.voanews.com
