၇-၉-၂၀၁၃ ရက်နေ့ ၁၁၃၀ အချိန် မွန်ပြည်နယ်၊ ရေးမြို့၊ ရန်ကြီးအောင်ရပ်ကွက်နေ ဦးရွှေလရောင်(ခ)ကိုရောင်(၅၀)နှစ်သည် ရေဖြူမြို့နယ်၊ ရားဖူးကျေးရွာရှိရာဘာခြံတွင် အလုပ်လုပ်ကိုင် နေစဉ် ဇနီးဖြစ်သူ ဒေါ်ခင်စန်း(ခ)မကြား(၄၉)နှစ်မှာ နေအိမ်တွင်သေဆုံးနေကြောင်း တစ်ရပ်ကွက်တည်းနေ ညီဖြစ်သူ ဦးအောင်မြိုင်(ခ)ဦးမိုင်၏ ဖုန်းဖြင့်အကြောင်းကြားချက်အရ နေအိမ်သို့ပြန်လာကြည့်ရှုရာ ဇနီးဖြစ်သူအား နေအိမ်မီးဖိုခန်းအတွင်း ပက်လက်အနေအထားဖြင့် ပါးစပ်အတွင်းပေါက်ပြဲဒဏ်ရာ(၁)ချက်၊ လည်ပင်းညိုမဲဒဏ်ရာ(၁)ချက်နှင့် ဦးခေါင်းနောက်စေ့ကြေမွဒဏ်ရာ(၁)ချက်ရရှိ၍သေဆုံးနေကြောင်း တွေ့ရှိရသဖြင့် စုံစမ်းဖော်ထုတ်အရေးယူပေးခဲ့ရန်တိုင်တန်းခဲ့ရာ ရေးမြို့မရဲစခန်း(ပ)၈၄/၂၀၁၃၊ ပြစ်မှု ပုဒ်မ ၃၀၂ ဖြင့် အမှုဖွင့်စစ်ဆေးခဲ့သည်။
အမှုနှင့်ပတ်သက်၍ ရေးမြို့မရဲစခန်းမှတပ်ဖွဲ့ဝင်များက အခင်းဖြစ်အရပ်သို့သွားရောက်စစ်ဆေးရာ သေဆုံးသူဒေါ်ခင်စန်း ၀တ်ဆင်ထားသည့်ထမီပေါ်မှ TOYOTA တံဆိပ်ပါ အမဲရောင်သော့ချိတ်တပ်လျက် (၃)ဟုရေးသားထားသည့် စတီးသော့(၁)ချောင်းအား တွေ့ရှိရသဖြင့်မေးမြန်းရာ ၎င်းအိမ်မှသော့မဟုတ်ကြောင်း ဦးရွှေလရောင်၏ပြောပြချက်အရသိရှိခဲ့ရသည်။ စုံစမ်းချက်အရ ရေးမြို့၊ အောင်မေတ္တာရပ်ကွက်၊ ဘူတာအနီး၊ ဒုံးဝင်းလမ်းတွင်ဖွင့်လှစ်ထားသည့် ““တနင်္သာရီ””တည်းခိုခန်းပိုင်ရှင်ထံမှ ၎င်းတို့၏တည်းခိုခန်းသို့ ၆-၉-၂၀၁၃ ရက်နေ့တွင် ဧရာဝတီတိုင်းဒေသကြီး၊ ကန်ကြီးထောင့်မြို့နယ်၊ တံခွန်တိုင်အုပ်စု၊ တိုက်ကြီးကုန်း ရွာနေ မျိုးဝင်း(၂၄)နှစ်ရောက်ရှိလာပြီး အခန်းအမှတ်(၃)တွင် တည်းခိုခဲ့ကြောင်း၊ မျိုးဝင်းမှာ စတင်တည်းခိုစဉ်က ၈-၉-၂၀၁၃ ရက်နေ့တွင်ပြန်မည်ဟုပြောဆိုခဲ့ကြောင်း၊ ၇-၉-၂၀၁၃ ရက်နေ့ ၁၂၀၀ အချိန်ခန့်တွင် တည်းခိုခန်းမှထွက်သွားပြီး ၁၇၀၀ အချိန်ခန့်တွင် ပြန်ရောက်လာကာ ပြန်မည်ဟုပြောဆို၍ တည်းခိုခန်းခ ရှင်းပေးခဲ့ကြောင်း၊ အခန်းအမှတ်(၃)သော့ပျောက်ဆုံးခဲ့ကြောင်းပြောဆို၍ သော့ဖိုးငွေကျပ်(၁၀၀၀ိ/-) ပေးလျော်ကာ တည်းခိုခန်းမှ ၎င်း၏ပစ္စည်းများယူ၍ ပြန်လည်ထွက်ခွာသွားကြောင်း သိရှိခဲ့ရသည်။
အမှုမှပြစ်မှုကျူးလွန်သူအား ဖမ်းဆီးရမိရေး စဉ်ဆက်မပြတ် သတင်းရယူစုံစမ်းခဲ့ရာ ပြစ်မှု ကျူးလွန်သူ မျိုးဝင်းမှာ မော်လမြိုင်မြို့၊ လှိုင်အဝေးပြေးကားဝင်းရှိ ““ခေတ်သစ်””တည်းခိုခန်းတွင် တည်းခိုနေကြောင်း၊ တည်းခိုခန်းတွင်မရှိဘဲ အပြင်သို့ထွက်သွားကြောင်း စုံစမ်းသိရှိခဲ့ရသည်။ ထို့နောက် မွန်ပြည်နယ်ရဲတပ်ဖွဲ့မှူးရုံး၊ မှုခင်းအကူအဖွဲ့မှတပ်ဖွဲ့ဝင်များ၊ ရေးမြို့မရဲစခန်းမှတပ်ဖွဲ့ဝင်နှင့် ဒိုင်းဝန်ကွင်း နယ်မြေရဲစခန်းမှတပ်ဖွဲ့ဝင်များပူးပေါင်း၍ လိုက်လံရှာဖွေဖမ်းဆီးခဲ့ရာ ပြစ်မှုကျူးလွန်သူ မျိုးဝင်း(ခ) နိုင်ဝင်းအောင်(ခ)ကီးလေးအား ၁၅-၉-၂၀၁၃ ရက်နေ့ ၁၅၀၀ အချိန်တွင် လှိုင်ကားဝင်းအတွင်းရှိ ““ကြည်နူးစံ””ထမင်းဆိုင်ရှေ့၌ ဖမ်းဆီးရမိခဲ့ပြီး ထိရောက်ပြစ်ဒဏ်ရရှိရေး ရေးမြို့မရဲစခန်းမှ ဆက်လက် ဆောင်ရွက်လျက်ရှိကြောင်း သတင်းရရှိသည်။
ရဲဇာနည်
