ယင်းဖြစ်ရပ်ကို ဘုရားဂေါပက ဦးစိန်ထွန်းက သြဂုတ် ၂၈ ရက် ည ၇ နာရီတွင် စတင်တွေ့ရှိခြင်းဖြစ်ပြီး ထိုအချိန်တွင် ဘုရားဝန်းအတွင်းမှ ဂန္ဓကုရီတိုက်အတွင်းရှိ အလှူခံပုံး နှစ်ပုံး၏ ရှေ့မှန်များကွဲနေပြီး အလှူခံပုံးထဲရှိ ငွေများလည်း ပျောက်ဆုံးနေကြောင်း ရဲစခန်း၏ မှတ်တမ်းများတွင် တွေ့ရသည်။
ထို့ကြောင့် ဂေါပက ဦးစိန်ထွန်းက ကျန်ဂေါပကအဖွဲ့ဝင်များကို ဆက်လက်အသိပေးပြီး ထိုမှတဆင့် မကွေးမြို့မ ရဲစခန်းသို့ သတင်းပေးပို့ တိုင်တန်းခဲ့ကြောင်း၊ ရဲစခန်းမှ ရဲများကလည်း မကြာမီသွားရောက် စစ်ဆေးခဲ့ကြောင်း ရဲဌာန၏ မှတ်တမ်းများတွင် တွေ့ရသည်။
ငွေများကို ခိုးယူသူသည် သံပန်းပြူတင်းပေါက်တံခါးများကို ဆွဲခွာပြီး အတွင်းရှိ မှန်လျောတံခါးကို တွန်းဝင်ခဲ့ကြောင်း၊ အလှူခံပုံးများ၏ မှန်ချပ်များကို အုတ်ခဲဖြင့်ထုခွဲ၍ ငွေများကို ယူသွားခြင်းဖြစ်ကြောင်း ရဲမှတ်တမ်းတွင် ဖော်ပြ ထားသည်။
ဂေါပကအဖွဲ့၏ အဆိုအရ ထိုအလှူခံပုံးနှစ်ပုံးထဲတွင် ငွေကျပ်တစ်သောင်းခန့်သာရှိကြောင်း ခန့်မှန်း ထားကြောင်း၊ ဂေါပကများက ရဲစခန်း၌ အမှုမဖွင့်သော်လည်း ရဲများကမူ အများပြည်သူလှူထားသော ငွေများဖြစ်သဖြင့် ခိုးယူသူကို အရေးယူရန် စုံစမ်းရှာဖွေပြီး ဆက်လက်ဖော်ထုတ်သွားမည်ဟု ရဲဌာနက ဆိုထားသည်။
အလားတူပင် သြဂုတ် ၁၄ ရက်ကလည်း မကွေးမြို့ ကန်သာရပ်ကွက်ရှိ အေးစေတီဆုတောင်းပြည့် ဘုရားမှ အလှူငွေ ကျပ်သုံးသိန်းနီးပါးရှိသော အလှူခံပုံးတစ်ခု ပျောက်ဆုံးသွားကြောင်း ထိုစေတီ၏ ဂေါပကအဖွဲ့က ရဲစခန်း၌ တိုင်တန်း ထားပြီး ရဲဌာနကလည်း အမှုအမှတ် (ပ) ၁၅၆/၂၀၁၃ ဖြင့် အမှုဖွင့်ထားကြောင်း ရဲဌာ၏ ထုတ်ပြန်ချက်များတွင် လေ့လာတွေ့ရှိသည်။
ဝိုင်းအောင်
Mizzima - News in Burmese
