Voice ။ ။ မမေဆွိနဲ့ နှစ်ယောက်တွဲ ရှိုးလုပ်ဖို့ စပြီးစီစဉ်ဖြစ်ပုံလေး သိပါရစေ။
MKL ။ ။ ချစ်ငယ်တို့ နှစ်ယောက်က ခရီးတွေ အတူသွားခဲ့ဖူးတယ်။ စတိတ်ရှိုး တွေလည်း အတူဆိုခဲ့ကြဖူးတယ်။ ဒါပေမဲ့ ချစ်ငယ်တို့ နှစ်ယောက်တည်း ရှိုးပွဲကတော့ တစ်ခါမှ မလုပ်ခဲ့ဖူးဘူး။ ဟိုတုန်းကတော့ ချစ်ငယ်တို့ နှစ်ယောက်ကို ရှိုးလုပ်ပေးဖို့ စီစဉ်ခဲ့ကြဖူးတယ်။ အကြောင်းအမျိုးမျိုးကြောင့် ပျက်သွားခဲ့တာပေါ့နော်။
အဲဒါနဲ့ မဆွေနဲ့ ချစ်ငယ် ဂျပန်မှာလုပ်တဲ့ ပွဲတစ်ခုမှာ ဆုံကြတော့ မဆွေရယ် ချစ်ငယ်တို့ ညီအစ်မတွေ အမှတ်တရ ပွဲလေးတစ်ခု လုပ်ရအောင်လို့ ပြောတော့ သူကလည်း ဝမ်းပန်းတသာပဲ လက်ခံတယ်။ ဒီပွဲကို အဓိက စီစဉ်တာက ချစ်ငယ်စီစဉ်တာပါ။ ဒါပေမဲ့ ချစ်ငယ်ရဲ့ အပေါင်းအသင်းတွေက သူတို့လည်း ပါချင်တယ်လို့ ပြောလို့ ချစ်ငယ် ပါခွင့်ပေးလိုက်ပါတယ်။ ပွဲကိုတော့ သီတင်းကျွတ် လပြည့်နေ့၊ အမျိုးသားကဇာတ်ရုံမှာ လုပ်နိုင်အောင်လို့တော့ ချစ်ငယ်ကြိုးစားနေပါတယ်။
Voice ။ ။ ဒီပွဲမှာ အစ်မတို့ နှစ်ယောက်အပြင် ဧည့်သည်တေးသံရှင်တွေ ပါဦးမလား။
MKL ။ ။ လူငယ်တေးသံရှင် လေးယောက်လောက်တော့ ပါပါမယ်။ သီချင်းတွေကတော့ ချစ်ငယ်က အပုဒ် ၂၀ လောက် ဆိုမယ်။ မဆွေက ၁၅ ပုဒ်လောက် ဆိုမယ်။ အဆိုတော် အငယ်လေး လေးယောက်ကတော့ တစ်ယောက်ကိုနှစ်ပုဒ်စီ ဆိုကြလိမ့်မယ်။ တီးဝိုင်းကတော့ Lazy Club နဲ့ Plus Three တစ်ခုခု ဖြစ်မယ်။ ချစ်ငယ်တို့ နှစ်ယောက်အပြင် ဧည့်သည် အဆိုတော်လေးတွေလည်း ဆိုဦးမှာဆိုတော့ သီချင်းပုဒ်ရေတွေ အများကြီး နားထောင်ပြီး ပရိသတ်တွေ ငြီးငွေ့သွားမှာ၊ အရမ်း ညဥ့်နက်သွားမှာလည်း ချစ်ငယ်စိုးတယ်။ အဲဒီတော့ ပွဲကို ချစ်ငယ် Right Time စပြီး ည ၁၁ နာရီလောက် သိမ်းမယ်လို့ စဉ်းစားထားတယ်။
Voice ။ ။ ဒီပွဲအတွက် ဘယ်သီချင်းတွေဆိုဖို့ ရွေးထားလဲ။
MKL ။ ။ ချစ်ငယ်ထွက်ခဲ့တဲ့ စီးရီးတွေကခွေ တစ်ရာကျော်လောက် ရှိတာဆိုတော့ ပွဲအတွက် သီချင်းရွေးတဲ့အခါ ချစ်ငယ်အတွက် အခက်အခဲ ရှိပါတယ်။ ဒါပေမဲ့ ပရိသတ်ကြိုက်မယ့် သီချင်းတွေ အကုန်လုံး ပါနိုင်အောင်တော့ ချစ်ငယ်ကြိုးစားမှာပါ။ သီချင်းတွေကတော့ Pop တွေလည်းပါမယ်၊ Rock တွေလည်းပါမယ်၊ လူကြီးပရိသတ်တွေ ကြိုက်တဲ့ မြန်မာသံသီချင်းတွေလည်း ချစ်ငယ်တို့နှစ်ယောက် ဆိုကြမှာပါ။
Voice ။ ။ နှစ်ယောက်လုံးက ဂီတလောကမှာ ခေတ်ပြိုင်ပေါ်ခဲ့တာဆိုတော့ မဆွေရဲ့ သီချင်းတွေထဲကရော ဘယ်သီချင်းတွေကို ကြိုက်လဲ။
MKL ။ ။ တစ်ခေတ်တည်း ပေါ်ခဲ့ကြတာ ဆိုပေမယ့် မဆွေက ချစ်ငယ်ရဲ့ ကြားဆရာဆိုလည်း မမှားပါဘူး။ သူ့ရဲ့သီချင်းတွေ တော်တော်များများ ချစ်ငယ်ကြိုက်ပါတယ်။ အကြိုက်ဆုံး သီချင်းတွေကတော့ ကိုကိုမကောင်းဘူးတို့၊ အင်းလေးမှာ ရွာတဲ့မိုးတို့၊ ကမ်းစပ်နဲ့ရေလှိုင်း တို့ကို ကြိုက်တယ်။ ဒီသီချင်းတွေက သူ့အသံနဲ့လည်း လိုက်တယ်။
Voice ။ ။ ဒီပွဲမှာ ဦးကိုင်ဇာကိုရော ခေါ်ဆိုဖို့ အစီအစဉ် ရှိလား။
MKL ။ ။ ဒီပွဲက မိန်းကလေးနှစ်ယောက်တည်း ပွဲဆိုတော့ ကိုညီ (ကိုင်ဇာ) ပါမှာမဟုတ်ဘူး။ ဒါပေမဲ့ ချစ်ငယ်နဲ့ တစ်ခေတ်တည်း ပေါ်ခဲ့ကြတဲ့ ချစ်ကောင်း၊ တူးတူး၊ ကော်နီ၊ ဟေမာနေဝင်းတို့လို ခေတ်ပြိုင် အဆိုတော်တွေချည်းပါတဲ့ ဖျော်ဖြေပွဲတစ်ခုလုပ်ဖို့ ချစ်ငယ် အစီအစဉ် ရှိပါတယ်။ အဲဒီအခါကျရင်တော့ ပါနိုင်မှာပါ။
Voice ။ ။ စီးရီးတွေထွက်ဖို့ အစီအစဉ်ရှိလား။
MKL ။ ။ စီးရီးကတော့ လုပ်မယ်ကြံလိုက်၊ စတိတ်ရှိုးဆိုဖို့ ခရီးတွေ သွားလိုက်ရနဲ့ဆိုတော့ အကောင်အထည် မပေါ်သေးဘူး။ ချစ်ငယ်က သီချင်းလည်းကြေး (ဂျီး) များ တယ်။ နောက်ပြီး ဟဲလေးနဲ့ ဆိုခဲ့တဲ့ မပြောချင်လို့ ကြည့်နေတာ ကြာပြီဆိုတဲ့ သီချင်းကလည်း အရမ်း ပေါက်ခဲ့တာဆိုတော့ အဲဒီသီချင်းကို မီတဲ့သီချင်းကောင်းတွေ ချစ်ငယ်လက်ထဲမှာ စုမိရင်တော့ စီးရီးထုတ်ဖြစ်မှာပါ။
Voice ။ ။ တစ်ခေတ်က မေခလာဆိုတာ ပွဲထိန်းကောင်းတဲ့ တေးသံရှင် တစ်ယောက်လို့ ပြောကြတယ်။ ရှိုးပွဲတစ်ခုမှာ ပရိသတ်နဲ့ တစ်သားတည်းဖြစ်ဖို့၊ ကိုယ့်ရဲ့ သီဆိုမှုမှာ စီးမျောလိုက်ပါဖို့ ဘယ်လိုအားထုတ်လဲ။
MKL ။ ။ အဲဒါကတော့ ကိုယ်ဆိုရမယ့်ပွဲက လူကြီးပရိသတ်များလား၊ လူငယ်ပရိသတ်များလား၊ ဒီပွဲက ဘယ်လိုပွဲမျိုးလဲ၊ ဘယ်မှာ လုပ်တာလဲဆိုတာကို ကြည့်ပြီး ကိုယ့်ရဲ့ စကားအပြောအဆိုနဲ့ Performance ကို ချစ်ငယ် ပြင်ဆင်တယ်။ လူကြီးပရိသတ် များတဲ့ပွဲမှာ ခေတ်သီချင်းတွေ သွားဆိုလို့ အဆင်မပြေသလို၊ လူငယ်ပရိသတ် များတဲ့ပွဲမှာလည်း ဟိုတုန်းက သီချင်းတွေ ချစ်ငယ်သွားဆိုလို့ မရဘူး။ ပွဲအနေအထားကိုကြည့်ပြီး ပရိသတ်ကို ဆွဲခေါ်ရတာပေါ့။ ဆွဲခေါ်တဲ့နေရာမှာလည်း ပရိသတ် ကိုယ့်ဘက်ပါအောင်ဆိုပြီး စကားတွေ အများကြီး သွားပြောရင်လည်း ပရိသတ်က မုန်းတယ်။ မလျှော့မတင်းပုံစံနဲ့ ပရိသတ်ကို ဆွဲခေါ်ရတာပေါ့။
Voice ။ ။ အခုအချိန်အထိ အားပေးနေတဲ့ ပရိသတ်တွေအတွက် ပြောချင်တာရှိရင် ပြောပေးပါဦး။
MKL ။ ။ ယနေ့ထက်ထိ ဂီတလောကမှာ ချစ်ငယ် ရပ်တည်နိုင်တာ ပရိသတ်တွေရဲ့ အားပေးမှုကြောင့်ပါ။ အဲဒီအတွက် ပရိသတ်တွေက ချစ်ငယ်ရဲ့ ထမင်းရှင်ပါပဲ။ မေခလာလို့ ဖြစ်လာအောင် အားပေးခဲ့ကြတဲ့ ပရိသတ်တွေကို ချစ်ငယ် ဘယ်တော့မှ မစော်ကားပါဘူး။ အမြဲတမ်း မေတ္တာပို့ပါတယ်။ အနုပညာရှင် တစ်ယောက်ဟာ ကိုယ့်ရဲ့ပရိသတ်ကို စော်ကားတဲ့နေ့ဟာ ကျရှုံးတဲ့နေ့ပဲလို့ ချစ်ငယ် မှတ်ယူထားပါတယ်။
(သန့်ဇင်ဦး) - The Voice Weekly
